Vise-Ministra Solidariedade Sosiál no Inkluzaun, Céu Brites, hamutuk ho delegasaun husi Timor – Leste akompaña husi Diretora WFP ba Timor - Leste, hetan konvite hodi halo enkontru kortezia ho Senadora Rubina Khalid, Xefia ba BISP (Benazir Income Support Programme), hamutuk ho Delegasaun husi Niger, iha Edifisiu BISP, Islamabad, Pakistaun (02/12/2025)

Objetvu husi enkontru ida-ne’e atu partilla ba malu kona-ba programa protesaun sosiál ne’ebé kada nasaun implementa ona, liuliu rona introdusaun jerál husi Senadora kona-ba implementasaun Programa BISP, au mesmu tempu enkoraja kolaborasaun entre nasaun hirak-ne’e.

Iha enkontru ne’e, Senadora hateten: “Pakistaun prontu atu partilla nia programa kona-ba BISP - nia susesu no dezafius”. Nia mós enkoraja kolaborasaun, servisu koletiva hodi rezolve problema sosiál ne’ebé ohin loron mundu enfrenta.

Iha enkontru kortezia ne'e Vise-Ministra halo introdusaun jerál kona ba jornada dezenvolvimentu programa BdMK SANUTRIO iha Timor-Leste ne’ebé influensiadu husi Programa BISP Pakistaun nian, inklui aprezenta mós knaar husi Forsa Traballu Global ka GTF (Global Task Force) ne’ebé xefia husi Prezidente Repúblika Demokrátika Timor – Leste, Dr. José Ramos Horta ba kombate Malnutrisaun no Ra'es-Badak.