Dili, 02 Dezembru 2025 – Ministru Agrikultura, Pekuária, Peskas no Florestas (MAPPF), Eng. Marcos ”MAMETA” da Cruz, MAgSt, hasoru embaixadór India mai Timor - Leste Madan Kumar Ghildiyal hodi dezkute asuntu kooperasaun atu haforsa setór agrikultura, pekuária,Peskas no Florestas iha Timor-Leste.

Hasoru malu ne’e halao iha sala reniaun Ministru Agrikultura, Pekuária, Peskas no Florestas (MAPPF) Comoro, Dili , iha loron tersa feira semana ne’e.

Enkontru entre Ministru Agrikultura, Pekuária, Peskas no Florestas (MAPPF) ho embaixadór India mai Timor-Leste Madan Kumar Ghildiyal bele hamtein liu-tan kooperasaun entre nasaun rua iha future.

Iha enkontru ne’e Ministru husu bá embaixadór atu apoiu liu tan programa iha sentru lima kona bá produsaun karau timor susuben tanba Timor-Leste presiza karau ho kualidade atu bele fó susuben di’ak.

Rona tiha pedidiu Ministru Agrikultura, Pekuária, Peskas no Florestas (MAPPF) nian , Embaixadór rasik promete nia prontu apoiu Ministériu Agrikultura, Pekuária, Peskas no Florestas hodi dezenvolve di’ak liu-tan setór haat ne’e. nia mós husu bá Ministru atu haruka mós karta ida bá nia hodi nune’e bele reforsa apoiu husi Governu India nian mai governu Timor-Leste hodi dezenvolve area prioridade sira iha Ministériu Agrikultura, Pekuária, Peskas no Florestas.

Embaixadór ne’e mós haktuir katak Governu India mós iha bolsa liu husi programa kapsitasaun bá funsionáriu sira iha area Agrikultura, Pekuária, Peskas no Florestas. Sira hakarak oferese treinamentu bá funsionáriu sira. Kada tinan, Timor-leste hetan vaga 15. Enkuantu India pronto fó vaga 3 bá MAPPF nia dehan bolsa ne’e rasik ninia kurtu prazu entre semana haat to’o semana ualu.

Ministru mós fó agradesimentu bá Governu India liu-husi Embaixadór Madan Kumar Ghildiyal tanba Timor-Leste mós bele importa fós husi India.

Iha enkontru ne’e hetan partisipasaun husi Diretór Jerál Pekuária, Diretora Nasionál Veterinária, Xefe Unidade Agro Komerisu, Seguransa Alimentra no Kooperasaun no mós Assesór Prinsipál.