𝐋𝐈𝐐𝐔𝐈Ç𝐀, 𝟎𝟑 𝐃𝐄𝐙𝐄𝐌𝐁𝐑𝐔 𝟐𝟎𝟐𝟓 – Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, kuarta ne’e partisipa iha serimónia ofisiál hodi selebra Loron Mundiál Ema ho Defisiénsia, ne’ebé hala’o iha salaun Sentru Tokodede, Munisípiu Liquiça ho prezensa reprezentante governu, organizasaun sosiedade sivil, asosiasaun Ema ho Defisiénsia (EHD), Funsionáriu no komunidade sira.

Iha selebrasaun tinan ne’e, Timor-Leste hetan tema nasionál: “Implementasaun PAN-EHD 2021–2030 no CRPD iha Nivel hotu-hotu mak xavi ba Timor-Leste hodi avansa progresu sosiál no haburas inkluzaun defisiénsia.”

Tema mundiál mak fó énfaze ba “Haburas sosiedade ne’ebé inkluzivu ba defisiénsia hodi avansa progresu sosiál.”

Iha serimónia ne’e, Sekretariu Estadu Peskas, espresa sentimentu kontente hodi hato’o Parabéns ba maluk sira ho Defisiénsia ne’ebé selebrasaun loron Mundiál ba Ema ho Defisiénsia iha Timor-Leste.

“Imi la mesak konta ho ami, iha momentu importante ne’e ha’u hakarak hato’o parabéns ba imi hotu”.

Membru Governu ne’e mós enkoraja maluk sira ho Defisiénsia atu lalika hanoin barak, tanba Konstitusaun fó garante ba diretu ema ho Defisiénsia, nune’e mós konvensaun Internasionál ratifika ona direitu ba ema ho Defisiénsia.

Tan ne’e ikus nia alerta ba Autoridade Munisípiu Liquiça nian katak ho selebrasaun ne’e tenke loke ona hanoin hodi tau prioridade ba ema ho defisiente sira iha Munisípiu Liquiça, tantu iha atendimentu públiku, nune’e mós konstrusaun infraestrutura sira.

Portantu komisaun Organizadór sira hato’o agradese ba parte governu no setór relevante tanba fó apoiu ba programa PAN-EHD no kontinua haree defisiénsia hanesan parte importante iha dezenvolvimentu nasionál.

Selebrasaun ne’e remata ho apelu ba instituisaun públiku no privadu sira atu kontinua hamutuk hodi hadi’a asesu, direitu igual no oportunidade inkluzivu ba ema ho defisiénsia hotu.