Ministra em Substituisaun, Ministériu Solidariedade Sosiál no Inkluzaun (MSSI), atuál Sekretária Estadu Igualdade (SEI), Elvina de Sousa Carvalho, akompaña husi Diretór Jerál Protesaun Sosiál, Floréncio Pina Dias Gonzaga hamutuk ho Família EhD Munisípiu Manatuto, selebra Loron Mundiál Ema ho Defisiénsia 3 Dezembru, iha Munisípiu Manatuto. Selebrasaun ne’e realiza iha Edifísiu Sentru Solidariedade Sosiál no Inkluzaun Munisípiu Manatuto, Kuarta-feira, (03/12/2025).

Objetivu Selebrasaun ne’e mak, atu Sensibiliza sosiedade kona-ba direitu Ema ho Defisiénsia (EhD), Promove partisipasaun EhD iha dezenvolvimentu nasionál no hametin solidariedade no igualdade iha Munisípiu hotu-hotu. Selebrasaun iha tinan 2025 ne’e, énfaze direitu, dignidade no oportunidade inkluzaun ba EhD, hodi hametin solidariedade no igualdade iha sosiedade Timor-Leste.

Tema Mundial ba selebrasaun ne’e: “Haburas Sosiedade Ne’ebé Inkluzivu ba Defisiénsia Hodi Avansa Progresu Sosiál”, enkuantu Tema Nasional: “Implementasaun Planu Asaun Nasionál-PAN Ema ho Defisiénsia-EhD 2021-2030 no CRPD Iha Nível Hotu-hotu mak Xavi ba Timor-Leste Hodi Avansa Progresu Sosiál no Haburas Inkluzaun Defisiénsia”.

Iha abertura, Ministra em Substitusaun MSSI hatete, “governu kontinua fó prioridade ba promosaun direitu EhD, no fó garantia katak inkluzaun la’os atu halo diskursu no selebra de’it, maibé oinsá komitmentu governu Timor-Leste atu implementa duni Planu Asaun Nasionál-PAN ba EhD hodi bele asegura direitu EhD iha Timor-Leste”, katak nia.

Entretantu, Prezidente Autoridade Munisipál Manatuto, Luís Inácio Henriques Fernandes, hato’o agradesimentu ba konfiansa husi Governu atu fó oportunidade ba Munisípiu Manatuto hodi organiza Selebrasaun Loron Mundiál EhD iha tinan 2025.

“ Ko’alia ba EhD sira tenke uza termus sira ne’ebé mak própriu no labele halo diskriminasaun ba sira”, tenik PAM

Selebrasaun ne’e organiza husi Funsionárius Sentru Solidariedade Sosiál no Inkluzaun Munisípiu Manatuto, ne’ebé hahú ho Misa agradesimentu, Marsa Inkluzaun no Distribuisaun ai-han ba EhD.

Partisipa iha selebrasaun ne’e mak hanesan, Administradores Postus Munisípiu Manatuto, PNTL, Reprezentante Veteranus inklui komunidade.