Díli-Kuarta, 03/12/2025, S.E. Ministra Finansas Sra.Santina José Rodrigues F. Viegas Cardoso, aprezenta projetu dekretu lei kona-ba Ezekusaun Orsamentu Jerál Estadu ba tinan 2026, ba Konsellu Ministru aprova ona, sorumutu extraordinaria ne'e hala'o iha palásiu Governu.

Dekretu-lei ida-ne’e estabelese regras ba ezekusaun Orsamentu Jerál Estadu ba tinan 2026, ne’ebé aprova hosi Lei n. 8/2025, loron 27 fulan-novembru, ne’ebé define prazu sira atu taka tinan fiskál, termus utilizasaun karta kréditu no kontas fidusiárias, no mós kondisaun rekursu ba adiantamentu kaixa no fundus maneiu, tuir rejime jerál ne’ebé vigora.

Ho objetivu atu limita kreximentu despezas korrentes (despeza baibain) no garante jestaun efisiente liu ba rekursus públikus, diploma ne’e introdús regras espesífikas ba despezas iha oras estraordináriu, viajen servisu, ajuda kustu no servisus catering nian, hodi reforsa kontrolu kona-ba rúbrikas ne'ebé sensivel tebes.

Governu Prevee mós reforsu ba auditoria interna, hodi estabelese ezijénsia obrigatóriu ba relatóriu semestrál sira kona-ba despeza sira-ne'e no mós kona-ba utilizasaun fundus maneiu no adiantamentu kaixa nian, nune'e promove responsabilizasaun, transparénsia no dixiplina ne’ebé boot liu iha ezekusaun orsamentál tinan 2026 nian.

Fontes: https://www.facebook.com/share/p/16eNDxZcSv