Díli, loron 3 fulan-dezembru tinan 2025__ Diretór Nasionál Polítika Igualdade Jéneru-SEI, Sr. Abílio Barreto, reprezenta Sua Exelénsia Sekretária Estadu ba Igualdade, Sra. Elvina Sousa Carvalho hodi sai oradór iha Kolókiu ho tópiku “Prevensaun Violénsia Bazeia ba Jéneru – Feto iha Desportu”, ne’ebé organiza husi Komisaun Atleta Timor-Leste/Athletes Commission Timor-Leste (AC-TL) iha Salaun Enkontru Luz Clarita, Díli.

Atividade ida-ne’e, hanesan okaziaun importante ba SEI hodi kontinua halo advokasia no partilla informasaun liga ba papél Sekretária Estadu ba Igualdade iha promosaun ba igualdade jéneru no inkluzaun sosiál liuliu Prevensaun Violénsia Bazeia ba Jéneru ne’ebé agora daudaun hala’o hela sosializasaun, konxiensializaun iha ámbitu kampaña loron 16 ativizmu kontra violénsia hasoru feto no labarik-feto iha Timor-Leste.

Atividade ida-ne’e mós ho objetivu atu haforsa prevensaun no kombate Violénsia Bazeia ba Jéneru (VBJ) iha área desportu, no promove ambiente seguru, inkluzivu, iguál ba feto sira ne’ebé envolve iha modalidade desportiva hotu.

Liuhusi partilla informasaun refere partisipante sira aumenta sira-nia kapasidade kona-ba forma VBJ ne’ebé akontese iha desportu (Asédiu Seksuál, estigma, diskriminasaun, abuzu poder no intimidasaun); Esplora fatór risku no dinamika estrutura desportu ne’ebé bele halo feto vulnerável ba VBJ; Promove lideransa feto iha área desportu (atleta, treinadora, administradora); Motiva instituisaun desportiva atu implementa politika “zero toleránsia” ba VBJ; Reforsa kapasidade partisipante sira atu identifika, prevene no responde ba kazu VBJ iha desportu; Fó inspirasaun ba feto atleta atu kontinua dezenvolve, sente valoriza no hetan espasu seguru no Promove kultura resiitu no igualdade iha klubu, federasaun, eskola no komunitáriu.

Partisipasaun SEI hodi sai oradór iha kolókiu refere mós aumenta konxiénsia atleta sira-nian kona-ba oinsá halo prevensaun VBJ iha desportu, reforsa protesaun ba feto atleta, no ema hotu (atleta no ofisiál sira) iha responsabilidade atu kria espasu desportivu ne'ebé seguru, inkluzivu no livre husi violénsia sira.

Fontes: https://www.facebook.com/share/p/1BTPEqS2Rj/’