Ministra Solidariedade Sosiál no Inkluzaun Verónica das Dores ho delegasaun Timor-Leste hala'o Vizita Kortejia ba Instituto Nacional de Previdência Social República Cabo Verde , hafoin hala’o enkontru bilateral ho Ministro da Família, Inclusão e Desenvolvimento Social (2/12/2025).

Vizita ida ne'e realiza ho objetivu atu reforsa kooperasaun no troka esperiénsia kona-ba sistema seguransa sosiál entre País irmão CPLP , Timor-Leste no Cabo Verde.

Durante vizita ne'e Ministra MSSI ho delegasaun simu mós informasaun kona-ba estrutura funsionamentu no servisu dijitalizadu ne'ebe INPS implementa hodi aumenta transparénsia no aksesibilidade ba benefisiárius sira.

Ministra ho delegasaun MSSI Timor-Leste hasoru direta kada diresaun INPS hodi haree funsionamentu ne'ebe diresaun ida-idak hala'o nudar mekanizmu importante ba seguransa sosiál ninia kontribuisaun liu-liu protesaun ba traballadór sira no maturasaun sistema pagamentu.

Tuir Ministra MSSI nia deklarasaun esperiénsia Cabo Verde iha área administrasaun previdénsia sosiál bele sai referénsia importante ba Timor-Leste hodi esforsu no mellora liu tan sistema seguransa sosiál ne'ebe forte, inkluzivu no sustentável.

INPS mos hato'o katak prontu atu halo kooperasaun ho Timor-Leste, liu husi kapasita formasaun téknika , dezenvolvimentu plataforma dijital no partilha modelu governasaun seguru sosiál.

Vizita ida ne'e Konsideradu hanesan parte importante hodi reforsa relasaun bilateral entre país membru CPLP , liu-liu Timor-Leste no Cabo Verde hodi fo motivasaun kontinua hametin promosaun direitus sociais no bein estar ba povu.

Mídia MSSI.