Ministra Solidariedade Sosiál no Inkluzaun Verónica das Dores reprezenta governu Timor-Leste partisipa iha II Reuniaun extraordinária Ministrus ba empregu no asuntu sosiais CPLP , ne'ebe realiza iha Cidade da Praia, Cabo Verde (3/12/2025).

Reuniaun altu nível ida ne'e ho tema "Migrasaun Laboral no Empregu Dignu iha CPLP " ho objetivu atu hadi'a no mellora liutan kompromisu polítika estadu membru CPLP hamutuk hodi promove polítika empregu dignu, justu no umanizadu hodi respeita direitu fundamental ba traballadór sira.

Iha intervensaun Ministra MSSI Timor-Leste reafirma liutan Timor-Leste nia Kompromisu kontinua servisu hodi garante protesaun sosiál to'o ba ema hotu hanesan, nune'e traballadór sira bele hetan oportunidade atu servisu iha kondisaun dignu. Tanba proteje traballadór sira hanesan mós proteje sira nia família, liu-liu grupu vulnerável sira.

Ministra akresenta investimentu ne'ebe diak ba traballadór sira mak investe ba formasaun no kualifikasaun profisionál , nune'e bele garante ba asesu traballu.

Entretantu partisipasaun Timor-Leste iha II Reuniaun extraordinária Ministrus ba asuntu sosiais CPLP hatudu Kompromisu no seriedade atu kontinua hadi'a sistema protesaun sosiál hodi Kontribui ba koezia no Solidariedade CPLP.

Iha okaziaun ne'e Ministra ho delegasaun Timor-Leste mós partisipa iha Feira Boas Práticas nudar inovasaun sosiál, inkluzivu no servisu komunidade.