𝐃𝐢𝐥𝐢, 𝟎𝟒 𝐝𝐞𝐳𝐞𝐦𝐛𝐫𝐮 𝟐𝟎𝟐𝟓 — Ministru Negósius Estranjeirus no Kooperasaun, 𝐁𝐞𝐧𝐝𝐢𝐭𝐨 𝐝𝐨𝐬 𝐒𝐚𝐧𝐭𝐨𝐬 𝐅𝐫𝐞𝐢𝐭𝐚𝐬 kinta-feira ne’e, hala’o audiénsia públika ho Komisaun B Parlamentu Nasionál ne’ebé trata ba Asuntus Negósius Estranjeirus, Defeza no Seguransa hodi ko’alia kona-ba ratifikasaun ba akordu ijensaun vistu entre Timor-Leste ho Repúblika Angola.

Iha loron 8 fulan-jullu 2024, iha ámbitu vizita estadu Prezidente Repúblika, José Ramos-Horta nian ba Angola, Ministru Bendito Freitas ho nia omólogu Ministru Relasaun Exteriór Angola nian, Téte António, asina akordu ijensaun vistu ba titulares passaporte servisu no diplomátiku entre nasaun rua ne’e.

Nune’e, ho ratifikasaun ba vistu ba passaporte servisu no diplomátiku ne’e, sei fasilita di’ak liután mobilizasaun sidadaun sira nasaun rua nian.

Alem de ne’e, Ministru Bendito mós aprezenta ba Komisaun B ligadu ho ratifikasaun ba dokumentu estatutu CPLP nian ne’ebé asinadu iha loron 27 fulan-marsu 2023 iha Luandu, Angola.

Audiénsia públika ho Komisaun B ne’e lidera husi Prezidente Komisaun, Domingos Augusto ‘Deker’ no partisipa husi deputadu bankada parlamentár no mós Xefe Gabinete Ministru, Filomeno Rómulo dos Santos Lay, Diretór-Jerál ba Assuntu Bilaterál ba Amérika, Europa no Áfrika, Ivens Gusmão no seluk tan.

Fontes: https://www.facebook.com/share/p/1DZs6uzjSL