Dili, 04 Dezembru 2025, Ministru Agrikultura, Pekuária, Peska, no Florestas (MAPPF), Eng. Marcos "MAMETA" da Cruz MAgSt partisipa sorumutu interministerial da-toluk koordenasaun ASEAN nian ne'ebé realiza iha salaun Ministériu Negosiu Estranjeiros no Kooperasaun (MNEC).

Sorumutu interministerial da-toluk Kooperasaun ASEAN nian ne'e prezide direta husi Primeiru Ministru (PM) Kay Rala Xanana Gusmão. Iha sorumutuk ne'e hetan partisipasaun máximu husi membrus do Governu sira, inklui pesoál apoiu tékniku husi kada Ministériu.

Durante reuniaun ne’e PM Xanana husu hodi halo atualizasaun bá progresu ne’ebé hala’o tuir Timor-Leste nia adezaun bá ASEAN, inklui submisaun Instrumentu Adezaun bá instrumentu legál sira ASEAN nian, no medida sira ne’ebé sei hala’o relasiona ho prosedimentu legál doméstiku sira bá Instrumentu Legál ASEAN sira seluk.

Membru Governu sira mós diskute kona-ba integrasaun iha estrutura sira ASEAN nian, subliña importánsia hosi pontu fokál sira ne'ebé dezignadu, kapasitasaun, reforsu rekursu umanu, no kriasaun Unidade ka Koordenadór sira ASEAN nian iha ministériu hotu-hotu. Medida sira ne’e ho objetivu atu garante koordenasaun, reprezentasaun, no salvaguarda interese Timor-Leste nian ne’ebé efetivu iha atividade hotu-hotu ASEAN nian.

Enkontru ne’e kobre mós preparasaun ba Timor-Leste nia knaar lideransa potensiál iha futuru iha ASEAN, arranju lojístiku no finanseiru ba partisipasaun iha enkontru sira, no atualizasaun kona-bá hahán gostu tradisionál sira.

Enkontru Koordenasaun Inter-ministeriál ne’e reafirma kompromisu Governu nian atu sai membru ASEAN ida ne’ebé ativu, konfiável no haree bá oin.