Maliana, loron 01 fulan Dezembru 2025

Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, halo abertura kursu formasaun preparatória ba Profesór foun Ensinu Sekundáriu Jerál no Ensinu Sekundáriu Tékniku Vokasionál ne'ebé organiza husi INFORDEPE parseria ho Institutu São João de Brito Liquiçá, iha eskola Agríkola Moleana, Postu Administrativu Maliana, Munisípiu Bobonaro segunda-feira ne’e.

Iha Diskursu Sua Exelénsia Sekretáriu Estadu ESJ-ESTV Sr. Domingos Lopes Lemos, hateten Formasaun ida-ne’e nu’udar bolu ba responsabilidade. Profesór ida-idak sei iha responsabilidade hodi orienta joven sira ne’ebé reprezenta futuru Timor-Leste nian. Profesór nia serbisu la limita ba transmisaun koñesimentu nian, maibé habelar ba formasaun sidadaun sira ne'ebé konxiente no apoiante no preparadu atu hasoru dezafiu sira, profesór nia kompromisu, dedikasaun, no étika profisionál sei sai krusiál hodi halo ensinu sekundáriu sai espasu ida ne'ebé importante ba beibeik ba aprendizajen, esperansa, no transformasaun.

"Investimentu ne’e la’ós prosesu administrativu de’it, maibé esforsu estratéjiku husi Ministériu Edukasaun atu hasa’e kualidade ensinu sekundáriu jerál no tékniku-vokasionál iha rai-laran tomak. Formasaun ne’ebé hahú ohin dezeña atu hametin abilidade pedagójika sira, promove metodolojia inovadora sira, integra teknolojia dijitál sira, no garante katak profesór sira preparadu atu hatán ba ezijénsia kurrikulár no nesesidade estudante timoroan sira nian".

Governante ne’e dehan, Iha tinan 2025, profesór hamutuk na’in 250, Profesór sira-seluk ne'ebé bolu hosi Bolsa Kandidatura sira nian sei iha formasaun ne'ebé asegura iha 2026, hodi kontinua esforsu nasionál hodi valoriza no profisionaliza karreira dosente nian.

Fatin hanesan Komisária Funsaun Públika Sra. Anita Tavares Ribeiro de Jesus deklara, formasaun ne'e pasu estratéjiku ida atu hasa'e koñesimentu profisionál no abilidade esensiál iha kontestu Administrasaun Públika. Profesór sira bele koñese didi'ak direitu, devér no responsabilidade hodi hala'o funsaun ho rigór, responsabilidade no dedikasaun. Kontribui ba hasa'e kualidade sistema edukasaun iha Timor-Leste.

"Profesór sira imi tenki aproveita didi'ak formasaun ne’e, tanba Profesór ne’e Vokasaun. hatudu imi-nia karater no vontade di’ak durante formasaun nune’e imi bele fahe ba estudante sira durante prosesu aprendizajen iha eskola, aproveita no tau iha prátika lisaun sira".