Dili, 1 Dezembru 2025 — Governu Timor-Leste, liuhusi Vise-Ministru ba Asuntus Parlamentares (VMAP),  S.E Adérito Hugo da Costa hatán ba debate no rekomendasaun husi Parlamentu Nasionál (PN) kona-ba kualidade no sustentabilidade Programa Merenda Eskolár (PME), no mós asuntu urjente sira seluk hanesan jestaun sidade no infraestrutura.

VMAP garante katak Ezekutivu sei foti asaun séria hodi hatán ba preokupasaun sira ne’ebé levanta husi Deputadu sira.

Iha plenária ne’e, Komisaun D (Ekonomia no Dezenvolvimentu) aprezenta relatóriu ne’ebé ho rekomendasaun forte ba Governu kona-ba Programa Merenda Eskolár, ne’ebé konsidera nu’udar ferramenta krítika hodi apoia nutrisaun no ekonomia lokál.

Valór Subsídiu: PN liuhusi Komisaun D rekomenda atu Governu estuda hodi hasa’e valór subsídiu diária ba estudante ida-idak, hodi aumenta husi $0.42 ba entre $0.77 no $0.88, atu nune’e bele kobre kustu moris ne’ebé sa’e.

Kompromissu Produtu Lokál: Husu atu estabelese meta klaru katak pelu menus 35% husi fornese ai-han ba Merenda Eskolár tenke mai husi orijén lokál, hodi fortifika agrikultura nasionál.

Nune’e VMAP afirma katak Governu rekoñese nesesidade urjente atu hasa’e kualidade no sustentabilidade PME. Governu sei foti medida hodi estuda ho lalais posibilidade atu hasa’e valór subsídiu no sei fortifika kordenasaun inter-institusionál atu bele garante katak meta ba utilizasaun produtu lokál ne’e bele atinje.

Iha parte lejizlativu, Komisaun A aprezenta relatóriu diskusaun espesialidade kona-ba Proposta Lei Kódigu Rekuperasaun no Insolvénsia. Votasaun Finál Globál ba lei ne’e adia ba aban hodi garante katak deputadu sira simu no bele halo análize ba dokumentu finál kompletu ne’ebé ho alterasaun hamutuk 29.

Iha sorin seluk Bankada sira hato’o sira-nia intervensaun hodi lori asuntu urjente husi komunidade mak hanesan:

Bankada CNRT foka ba problema desordenamentu iha Dili no kondisaun estrada a’at iha munisípiu sira.

Bankada FRETILIN hato’o alerta seriu kona-ba fa’an livre ai-moruk ilegál ne’ebé ameasa saúde públika.

Bankada PLP foka liu ba dezafiu iha baze hanesan falta bee moos no kualidade estrada asesu rurál.

Nune’e Vise–Ministru ba Asuntus Parlamentares, garante katak Governu sei foti medida urjente hodi rezolve kestaun sira ne’e. Governu sei lansa asaun hodi regula no organiza sidade Dili hodi asegura sirkulasaun ne’ebé di’ak, no sei alerta Ministériu relevante no Inspetór sira hodi halo atuasaun ba fa’an produtu ilegál sira. VMAP hatutan katak preokupasaun kona-ba estrada no direitu funsionáriu mós sei hato’o ba Ministériu relevante sira hodi hetan rezolusaun.

Iha plenária ne’e, Parlamentu Nasionál (PN) hatudu ninia papél fiskalizadór ho rekomendasaun forte kona-ba Programa Merenda Eskolár (PME), husu atu hasa’e valór subsídiu diária no estabelese meta uza produtu lokál. Aleinde ne’e, Governu mós promete atu rezolve ho medida urjente dezafiu sira seluk ne’ebé bankada sira lori husi baze, hanesan jestaun desordenamentu iha Dili, kondisaun estrada aat, no fa’an ai-moruk ilegál, hodi reflete esforsu ida ne’ebé kompletu husi Ezekutivu atu hatán ba preokupasaun krítiku sira ne’ebé afeta vida públika no dezenvolvimentu nasionál”.  (©MediaGVMAP)

Fontes: Governu Garante Asaun Séria hodi Responde ba Rekomendasaun PN Kona-ba Merenda Eskolár no Jestaun Sidade | Portal GVMAP