06 Dezembru 2025: Ministra Saúde (MS) dr. Élia A.A. dos Reis Amaral, SH partisipa aniversáriu Eskola Superior Medisina ba dala-20 husi Fakuldade Medisina no Siénsia Saúde no mós Selebra Loron Medisina Amerika Latina aumezmu tempu simu xefe misaun brigada médiku Cuba foun nian iha Timor Leste (TL), iha Emabiaxada Repúblika Cuba, Motael, Dili.

MS iha biban ne’e fó parabéns ba aniversáriu Eskola Medisina Superior no obrigadu ba brigada médika Cuba nian ba tinan rua nia laran, no fó benvindu ba xefe misaun foun husi brigada médiku Cuba nian iha TL. Selebrasaun ne'e hanesan parte ida husi istória aten-barani, solidariedade no konstrusaun pasiente ba ita-nia sistema saude.

“Ami sente orgullu tanba ami iha doutór rihun ida resin, ne’ebé serve populasaun iha munisípiu hotu-hotu, Ospitál Referénsia no Sentru Saúde Komunitária (SSK) sira, ida-ne'e la akontese tanba oportunidade maibé ida-ne'e mak rezultadu husi vizaun Estadu Timor-Leste atu investe sériu iha formasaun médika.

Obrigadu ba servisu ne'ebé Univerdades Nasionál Timor Lorosae (UNTL) halo no ninia eskola superiór ba medisina, ninia misaun mak atu fó formasaun ba profisionál médiku sira ne'ebé kualifikadu ho kompeténsia sientífika, téknika no umanu, ne'ebé kompromete ba étika, umanizmu, prinsípiu Saúde Públika, no kooperasaun solidariedade ho Repúblika Cuba liuhusi brigada médika Cuba nian, ne'ebé fó apoiu hahú kedas ba dezeñu no implementasaun kursu médiku nian, nune'e mós ba formasaun klínika no formasaun espesializada.”

MS hatutan “Hodi Governu, Povo no Ministeriu Saúde nia naran, agradese ba imi hotu ne'ebé kontribui ona durante tinan 20 ne'e, fundador sira, estudante primeiru ne'ebé partisipa iha projetu emerjente, profesór Timoroan sira no profesór sira husi Cuba, parseiru Nasionál no Internasionál hotu-hotu ne'ebé sempre fó apoiu hodi serve ita-nia komunidade.”

Partisipa iha selebrasaun ne’e maka; Embaixador Repúblika Cuba, Embaixador Angola, emabaixadora Saudi Arábia, Vise-Dekano Medisina UNTL, Diretor Jerál no Nasionál sira, Profisionál saúde, estudantes no Seluk-seluk tán.

#MídiaPalácioDasCinzas