BAUCAU, 03 DEZEMBRU 2025 - Ministériu Juventude, Desportu, Arte no Kultura (MJDAK), liuhosi Diresaun Nasionál Asosiativizmu Juventude (DNAJ), partisipa iha Komemorasaun Loron Mundiál ba Ema ho Defisiénsia ne’ebé organiza husi MSSI hamutuk ho Autoridade Munisipiu Baucau iha Baucau.

Iha eventu ne’e, Diretór Diresaun Nasionál Asosiativizmu Juventude (DNAJ), Sr. Mario Tilman, ezersita knaar atu reprezenta ofisiálmente MJDAK tuir despaxu husi Sua Exelénsia Ministru, iha nia diskursu, hateten katak Estadu iha devér atu asegura direitu hanesan ba sidadaun hotu, no “labele husik ema ida iha kotuk”, hodi garante dezenvolvimentu nasionál ne’ebé inkluzivu.

PONTU XAVE HUSI MJDAK:

Reafirmasaun Direitu: Sidadaun Ema ho Defisiénsia (EhD) iha direitu atu uza fasilidade no labele hetan diskriminasaun, bazeia ba Konstituisaun RDTL Artigu 16.

Implementasaun PAN-EhD: Timor-Leste ratifika ona Konvensaun CRPD no implementa Planu Asaun Nasionál ba EhD (PAN-EhD). MJDAK hola parte ativu iha planu intervensaun setór nian.

Kompromisu Foun (2026-2030): MJDAK foka liu ba dezenvolvimentu Desportu EhD hodi reforsa atleta sira-nia partisipasaun iha eventu nasionál no internasionál.

ATLETA EhD HETAN PRESTASAUN BOOT!

Liuhosi apoiu ba CPNTL no SOTL, atleta EhD sira lori ona fali medalla hamutuk 13 ba nasaun, iha kompetisaun internasionál hanesan ASEAN Para Games no World Shamer Games! Prestasaun ida ne’e hatudu poténsia no dedikasaun atleta EhD sira-nian.

APOIU JUVENTUDE INKLUZIVU

MJDAK mós apoia Asosiasaun Defisiénsia Timor-Leste (ADTL) liuhosi formasaun sívika no inkluzaun iha programa lideransa. Iha Programa PFN (Parlamentu Foinsa’e Nian), joven EhD na’in-rua inklui hamutuk ho joven sira seluk hodi prepara ba lideransa futuru nian!

MJDAK kontinua komprometidu atu harii Timor-Leste ne’ebé justu, igual, no inkluzivu ba hotu!

#MJDAK #DNAJ #EmaHoDefisiénsia #Inklusaun #TimorLeste #Baucau #LabeleHusikEmaIdaIhaKotuk #MídiaMJDAK