DILI,09/12/2025: Ministru Dezenvolvimentu Rural no Habitasaun Komunitaria (MDRHC) Eng. Mariano ASSANAMI Sabino, abertura formasaun kona-ba estabelesimentu padraun tekniku tuir perspetivu arkitetura no enjenaria sivil iha area habitasaun nian ba tekniku sira husi Diresaun Nasional Kontrolu Kualidade Habitasaun (DNQH sigla Portuges), iha Salaun Sentru Formasaun Vizaun Foinsa’e, iha Kaikoli.

Iha serimonia abertura formasaun ne’e, Ministru MDRHC destaka pontu importante sira ne’ebe bele garantia servisu Diresaun Nasional Kontrolu Kualidade Habitasaun nian ne’ebe ohin loron responsabiliza ba obra kontrusaun uma dignu sira ho estandarizasaun ka tuir padraun.

“Ita mak halo uma, ita mak tenke kontrola no garantia ninia kualidade, la’os ema seluk mak mai kontrola fali, entaun formasaun ne’e importante tebes ba funsionariu destakadu husi munisipiu sira atu foku nune’e bele servisu hamutuk ho kompaña implementador sira hodi garantia obra ne’ebe ho kualidade tuir padraun,” dehan Ministru MDRHC.

Formasaun ne’e, hahu ohin loron 09 to’o 15 fulan-Dezembru 2025, ne’ebe partisipa husi funsionariu husi Diresaun Nasional Habitasaun ne’ebe destakadu iha munisipiu no orador sira balun mai husi MOP no UNPAZ.