𝐃𝐢𝐥𝐢, 𝟎𝟗 𝐝𝐞𝐳𝐞𝐦𝐛𝐫𝐮 𝟐𝟎𝟐𝟓 — Parlamentu Nasionál (PN) liu husi sesaun plenária tersa-feira ne’e aprova ona proprosta rezolusaun no.46/VI (3a) kona-ba akordu ijensaun vistu ba titulares passaporte servisu no diplomátiku entre Timor-Leste ho Angola no mós proposta rezolusaun no.47/VI (3a) sobre ratifikasaun ba revizaun Estatutu foun CPLP nian ho votu afavór 51 kontra no abstensaun zero.

Ministru Negósius Estranjeirus no Kooperasaun, Bendito dos Santos Freitas justifika, proposta rezolusaun rua ne’e importante, nune’e bele fasilita portadores passaporte diplomátiku no servisu/ofisiál entre nasaun rua ba loron 90 nia laran durante hala’o misaun ofisiál estadu nian.

Ba sira-ne’ebé lori ho família, tenke aprezenta ba servisu imigrasaun nasaun rua nian, nune’e bele hetan autorizasaun ba rezidénsia.

Maski nune’e, Ministru hatutan, proposta rezolusaun no.47/VI (3a) sobre revizaun ba Estatutu Comunidad dos Países de Língua Portuguesa (CPLP) presiza hetan aprovasaun iha Parlamentu Nasionál, tanba estatutu refere ninia redasaun aprovadu ona iha loron 27 fulan-marsu 2023 Luanda, Angola.

Estatutu foun ne’e aprezenta husi Angola ho objetivu atu inklui tan instrumentu jurídiku ida kona-ba kooperasaun ekonómika emprezariál entre estadus-membru CPLP sira. Nasaun hirak ne’ebé ratifika ona revizaun ba Estatutu foun CPLP ne’e mak São Tomé e Príncipe, Angola no Portugal no Timor-Leste.

Maski proposta rezolusaun rua ne’e passa ho votus unánime, maibé deputadu sira rekomenda atu nasaun membru CPLP sira tenke implementa akordu hirak ne’e ho di’ak, nune’e bele konsolida liután kooperasaun interministerial ho estadus-membrus sira iha área oi-oin.

Fontes: https://www.facebook.com/share/p/1DJJdEUoHm