Tokyo, Iha loron 9 fulan Dezembru 2025, Sekretáriu Estadu ba Formasaun Profisionál no Empregu, Sua Exa. Rogério Araújo Mendonça, ofisiálmente halo asinatura Memorandu Kooperasaun ho Ajénsia Sainokuni Takumi Business Cooperative Association, nudar parte importante ba implementasaun Programa Estajiariu Tékniku (TIT) husi Timor-Leste ba Japaun.

Serimónia asinatura ne’e halao ho akompanamentu no testemuña direta husi Sua Exa. Embaixadora Timor-Leste iha Japaun, Sra. Maria Terezinha da Silva Viegas, no Konselleiru Sr. Celio Moniz da Silva. Delegasaun SEFOPE ne’ebé partisipa iha serimonia ne’e mak inklui Sr. João Pereira Correia (Diretor Nasionál Empregu Estranjeiru), Sr. João Mendonça (Adidu Traballu), Sr. Afonso Soares Paiva (Asesor Polítiku ba GSE), no Sr. Alexandrinho Lopes Barreto.

Iha diskursu, Sekretáriu Esta

du hato’o apresiasaun boot ba Ajénsia Sainokuni tamba prontu hamutuk ho SEFOPE atu estabelese parcerias efetiva ba Programa Estajiariu Tékniku, ho objetivu fó oportunidade ba juventude Timor-Leste atu hetan formasaun tékniku no profisionál.

Vice-Presidente Ajénsia, Sr. Liu Bin, hato’o mos nia kontente no agradesimentu ba SEFOPE, no nia loloos hanoin katak akordu kooperasaun ida ne’e sei kontribui ba fortalesimentu relasaun Amizade no kooperasaun entre Timor-Leste no Japaun. Nia sublinha katak Ajénsia Sainokuni la'ós deit simu estajiariu, maibé mos iha kapasidade hanorin lian Japonés liu husi Eskola Lian Japonés nian, hodi prepara estajiariu sira ho abilidade komunikasaun ne’ebé forte molok sira tama iha fatin estajiu.

Tuir informasaun husi Sr. Liu Bin, Ajénsia ne’e halao formasaun lian Japonés ba ema estranjeiru iha Japaun dala haat (4) kada tinan, no kada etapa envolvimentu ema to’o 120. Iha planu, Ajénsia Sainokuni sei vizita Timor-Leste iha fulan Junu 2026 hodi halo prosesu rekrutamentu ba kandidatu foun.

Akordu ida ne’e nu’udar dalan diak ba Timor-Leste atu investe iha formasaun no kapasidade hodi jera oportunidade ne'ebé susténtavel ba jovens Timoroan no hametin kooperasaun internasionál.