Iha loron 08 fulan Dezembru 2025, iha Prefecture Kagoshima, Japaun, Sekretariu Estadu ba Formasaun Profisionál no Empregu, Sua Excelência Rogério Araújo Mendonça, hamutuk ho ekipa SEFOPE, Sr. João Correia Pereira, Diretor Nasional Empregu Estranjeiru, Sr. João Mendonça, Adidu Traballu Japaun, Sr. Afonso Soares Paiva Asesór no Sr. Alexandrinho Lopes Barreto, Tékniku ba OTIT ho akompanhamentu husi Embaixada RDTL nian iha Tokyo, reprezenta husi Sr. Celio Moniz da Silva, hala’o selebrasaun ofisiál hodi asina Memorandum of Cooperation (MoC) ho ajénsia supervizora foun, Reimei Business Cooperative.

Objetivu prinsipal husi akordu ida ne’e mak hodi formaliza no estabelese base legál ba kooperasaun entre SEFOPE ho Reimei Business Cooperative iha implementasaun programa Estajiáriu Tékniku (TIT) ba jóvens Timoroan iha Japaun. Kooperasaun ne’e sei foku ba área prioritária sira hanesan:

- Agrikultura

- Hospitalidade

- Kuidadu Idoso

- Restaurante

- Konstrusaun

Akordu ne’e fó oportunidade atu aumenta partisipasaun no empregabilidade ba jóvens Timoroan sira liu husi programa estajiu, atu sira bele hetan experiénsia, koñesimentu tékniku no formasaun profisionál iha ambiente internasionál.

Iha okazaun ida ne’e, Direktór Reimei Business Cooperative, Sr. Fukusaki Yasushi, hato’o nia esperansa atu programa ida ne’e la’ós de’it programa estajiu, maibé forma parte hosi estratejia dezenvolvimentu kapasidade no inkluzaun formasaun lian Japonés ba kandidatu sira. Nia husu SEFOPE atu konsidera boot parte formasaun lian Japonés tanba ne’e sei fó preparasaun diak liu ba estajiaru sira, no aumenta chance ba sira atu adapta no konkorre iha merkadu traballu Japonés nian.

Akordu ida ne’e nia signifikadu boot iha sentidu dezenvolvimentu kapasidade, troka esperiénsia internasionál no kontribui ba dezenvolvimentu sosio-ekonómiku iha Timor-Leste, liu-liu iha domíniu formasaun no empregu ba jerasaun foun

Iha okaziaun ne’e, Sekretáriu Estadu hato’o sagradesimentu boot ba Reimei Business Cooperative, tanba sira prontu simu no aseita estabelese akordu kooperasaun ho SEFOPE, hodi implementa programa Estajiu Tékniku nian, ne’ebé fó oportunidade ba jóvens Timoroan atu hetan formasaun no experiénsia profesionál iha Japaun.

Aliende ne'e, Empregador komprometidu atu iha fulan Fevereiru tinan 2026 sei ba Timor hodi hahu halo rekrutamentu ba kandidatu sira nebe sei mai halao servisu ka estajiu iha area konstrusaun liu-liu halao servisu iha Portu nian.

Hafoin asina MoC, Sekretariu Estadu ho ekipa diretamente halo kedas site visit ba fatin ne'ebelé Estajiariu Tekniku Timor sira sei mai halao estajiu iha portu Ibusuki, Prefecture Kagoshima.

Ikus husi sorumutu ne'e, delegasaun Timor-Leste ho parte Reimei hola sessaun foto komun no almosu fratenidade hanesan sinal boa-vontade atu hametin relasaun kooperativu ida ne’e.