Díli, 10 Dezembru 2025

Prezidente Repúblika no Laureadu Nobel ba Pás, Dr. José Ramos-Horta, atribui Prémiu Direitus Umanus “Sérgio Vieira de Mello” ba manan sira, edisaun da-18, iha serimónia ofisiál ne’ebé akontese iha Palásiu Prezidensiál Nicolau Lobato, loron Kinta (10/12). Serimónia ida-ne’e tuir ona tradisaun tinan-tinan, kuandu Timor-Leste hamutuk komemora Loron Internasionál Direitus Umanus.

Sekretáriu Estadu Kooperativas (SEKoop), Eng. Arsénio Pereira da Silva, M.Agr., partisipa iha okaziaun ida-ne’e, hamutuk ho konvidadu onra sira seluk no korpu diplomatiku sira ne'ebé maka residenti iha Timor-Leste.

Prémiu Sérgio Vieira de Mello, ne’ebé lansadu husi Prezidente Ramos-Horta iha 2008, iha objetivu atu rekoñese kontribuisaun husi individuu no organizasaun sira—nasionál ka internasionál—iha promosaun, protesaun no defesa direitus umanus iha Timor-Leste. Prémiu ne’e fó ba tinan-tinan tuir Deklarasaun Universál Direitus Umanus, hodi valoriza esforsu sira ne’ebé fó impaktu boot ba sociedade.

Iha tinan 2025, prémio ne’e fó tuir kategoria rua: Direitu Sivíl no Polítiku no Direitu Ekonómiku, Sosiál no Kulturál. Konsellu Onra halo avaliasaun rigorózu, inklui vizita verifikasaun ba kandidatura sira antes deklara manan sira ofisiálmente. Tuir Dekretu Prezidente Repúblika N.º 129/2025, manan sira mak hanesan tuir mai:

Kategoria I: Direitu Sivíl no Polítiku

1. Isabel Antónia da Costa Galhos

2. Me. Leonie Manalu, FCJM

3. Julião Cardoso

Kategoria II: Direitu Ekonómiku, Sosiál no Kulturál

1.Kooperativa Comsoi

2.Grupo Monocura

3.Assosiasaun Esperansa Feto Difisiénsia

Prezidente Ramos-Horta, iha ninia diskursu, hato’o onra no aprezu ba manan sira atu kontinua hala’o servisu hanesan defensór direitus umanus:

“Iha aniversáriu Deklarasaun Universál Direitus Umanus, ita rekoñese personal no organizasaun sira ne’ebé aten barani. Sira nia servisu mak fundamentu ba justisa, dignidade no igualdade iha nasaun. Sira representa espírito Sérgio Vieira de Mello, ne’ebé ninia legadu kontinua inspira esforsu koletivu atu hadia Timor-Leste.”

Tuir Dekretu-Lei n.º 15/2009, cada vensedor simu sertifikadu no prémio osan total USD $10,000.

#Média SEKoop