Bobonaro 08/12/2025: Ministro do Desenvolvimento Rural e Habitação Comunitaria (MDRHC) Eng. Mariano ASSANAMI Sabino, hamutuk ho grupo Akikultura Habana, hodi Koilleta ikan Nila, iha Aldeia Raifun Vila, Postu Administrativu Maliana, Munisipiu Bobonaro.

Iha Intervensaun Ministru MDRHC, kongratula grupo refere tanba hatudu vontade badinas nian hodi hakiak ikan ne’ebe hatudu progresu diak. Tanbe ne’e funsionariu destakadu Ministeriu nian sei kontinua hare no servisu hamutuk atu bele hetan apoiu husi Ministeriu.

“Inisiativa husi grupo ne’e diak teb-tebes ita hare katak bele ho esforsu rasik hodi lao ona. Dezenvolvimentu rural ne’e atu apoiu duni sira ne’ebe mak iha ona inisiativu atu apoiu liu tan hodi habarak no haluan depois bele iha nia rendimentu diak liu,” hatete Ministru.

Ministru MDHC hatete katak, rezultadu ida-ne’e la’ós de’it indikasaun kapasidade agrikultura akuatika, maibé mos prova katak komunidade Maliana kontinua hodi halo inovasaun iha diversifikasaun atividade ekonomika.

Grupo Habana, ne’ebé total membru nian 8, mak inisiativa rasik husi jovem sira ne’ebé hodi forma grupo hodi ikan nila ho objetivu hodi ajuda ekonomia no fasilita sira hodi atende nesesidade familia inklui edukasaun oan sira nian.

Grupo ne;e mos halo atividade produsaun Agrikola ne’e integradu, balun hakiak ikan, balun hakiak Fahi, Manu no kuda modo ho objetivu atu hadia ekonomia hodi reduz kiak iha baze no importante liu oinsa mak produz hahan nutritivu hodi fo han ba oan sira nudar dalan ida ba kombate mal nutrisaun.

Xefe Grupo Habana Agusto de Jesus hatete, total kolam ne’ebé iha 12 ho kapasidade média 500 ikan ba kada kada kolam.

“Ami prepara mos kolam adisionál (1), ho kapasidade 1.000 ekor ikan nila, total ikan ne’ebé hetan maka 6.500 ekor,” Xefe Grupo ne’e hatete.

Tanba ne’e, nia husu ba Ministeriu MDRHC atu akompaña no apoiu sira atu bele haluan ka aumenta tan sira nia atividade ne’e.