Oecusse, 04 dezembru 2025 - Sua Exelénsia Ministra Edukasaun Dra. Dulce de Jesus Soares ensera treinamentu empreendedorizmu no feira ba hakbi'it juventude rurál sira liuhusi treinamentu abilidade ba partisipasaun ekonómika iha Eskola Sekundária Téknika Vokasionál Palaban iha Rejiaun Administrativa Espesiál Oecusse Ambeno.

Hafoin ensera Sua Exelénsia Ministra Edukasaun Dra. Dulce de Jesus Soares hateten, Ministériu Edukasaun liuhusi kooperasaun ho Konsellu Británika ba ASEAN, UN Women halo formasaun STEP ka treinamentu ida kona-ba partsipasaun ekonómika ne'ebé fokus liu ba labarik feto sira husi ensinu sekundáriu Tekniku vokasionál no profesór sira hotu.

" Objetivu husi treinamentu ida ne'e atu hanorin estudante sira ne'e hodi oinsá sira bele koñese literasia finanseira no dezenvolve empreendedorizmu nune'e aban bainrua remata sira-nia estudu, bele uza abilidade ida-ne'e hodi dezenvolve ekonomia ba sira-nia an", Dehan S.E. Ministra.

Governante ne'e esplika, simples tebe-tebes ohin estudante sira halo aprezentasaun kona-ba materia ne'ebé durante ne'e sira aprende liu-liu kona-ba marketing, komunikasaun no produtu oin-oin no modernu tebes maka sira halo Sukaer sai ba saos.

Iha fatin hanesan, Reprezentante Konsellu Británika ba ASEAN UK SAGE Sra. Rebecca Hales argumenta, Projetu ida-ne'e hetan apoiu husi UK SAGE hodi promove labarik feto sira liu-liu iha nasaun ASEAN.

" Iha Timor-Leste ami agradese tebes tanba servisu di'ak ho Ministériu Edukasaun hodi implementa projetu ida ne'e nomós bele hetan rezultadu balun liuhusi profesór sira-nia mudansa wainhira hanorin iha sala laran", Tenik Sra. Rabecca.

Enkuantu atividade treinamentu no feira empreendedorizmu ne'e hala'o durante loron rua husi loron 3 to 4 fulan dezembru no hetan partisipasaun husi estudante no profesór sira.