Ministériu Solidariedade Sosiál no Inkluzaun (MSSI) hamutuk ho Fundus Nasoins Unidas ba Labarik (UNICEF-Sigla Inglés) hala’o enkontru ho objetivu atu avalia progresu servisu sosiál sira durante tinan 2025, no determina prioridades atu kontinua hala’o servisu hamutuk iha área protesaun sosiál, liuliu ba assuntu Protesaun Labarik, Ema ho Defisiénsia-EhD, Programa Bolsa da Mãe-BdM Kondisionál inklui Formasaun no Kapasitasaun.

Enkontru tinan nia rohan ne’e abertura husi Diretór Jerál Protesaun Sosiál, Floréncio Pina D. Gonzaga, iha Edifísiu Sentral MSSI-Kaikoli-Díli, Tersa-feira, (09/12/2025).

“Servisu parseria entre MSSI ho UNICEF durante ne’e la'o di'ak, tanba UNICEF reforsa duni implementasaun programa MSSI nian, maibé iha enkontru ida-ne'e ita presiza identifika dezafius servisu sira ne'ebé iha, nune'e bele hadi'ak liután iha futuru,” katak DJ.

Entretantu, Xefi Seksaun Protesaun Labrik Unicef, Suman Khadka hatete, Unicef sei kontinua nafatin fó apoiu ba Governu, liu husi MSSI, hodi haforsa sistema protesaun sosiál iha Timor-Leste.