Ministériu Solidariedade Sosiál no Inkluzaun (MSSI), ho Ministériu Saúde (MS) inklui Programa Ai-han Mundial (WFP-sigla Inglés), ofisialmente hala’o Lansamentu Ai-han Nutritivu Super Sereal ba Inan Isin-Rua, Inan Fó-Susu no Labarik idade husi tinan 3 mai kraik, iha Postu Administrativu Soibada, Munisípiu Manatuto, Kuarta-feira (10/12/2025).

Mekanizmu protesaun sosiál ida-ne’e ho objetivu atu kombate malnutrisaun no promove saúde inan no oan, liuhusi apoiu ai-han nutritivu ne’ebé adekuadu, hodi investe ba futuru nasaun liuhusi oan sira.

Antes hala’o lansamentu, Ministra Solidariedade Sosiál no Inkluzaun, Verónica das Dores, hala’o diálogu ho komunidade Suku 5 pertense ba Postu Soibada mak hanesan; Suku Maun-Fahe, Suku Fatumaquerec, Suku Leo-Hat, Suku Manlala no Suku Samoro, no distribui ai-han ho pakote komplementar ba Benefisiariu hamutuk 500.

Hafoin lansamentu ne’e, Ministra MSSI ho komitiva kontinua vizita Sentru Saude Mental São João de Deus Laclubar, hodi Selebra Natal hamutuk ho komunidade defisiénsia mentál iha sentru refere.