Díli, 11 Dezembru 2025

Sekretaria Estadu Kooperativas (SEKoop), liu husi Direção Nasional Polítika Reforma no Kapasitação Gestão Kooperativas (DNPRKGC), hamutuk ho CV OSFOR Damai Sejahtera, fasilita formasaun kona-ba Dezenvolvimentu Kooperativa no Produtu Kooperativu durante loron tolu iha Salaun Correios, Díli.

Formasaun ida-ne’e ho objetivu atu hasa’e kapasidade funsionáriu sira iha área gestão no dezenvolvimentu kooperativa, nune’e bele fó kontribuisaun diretu ba dezenvolvimentu ekonomia familiár no komunidade.

Iha sesaun abertura, Eselénsia Sekretáriu Estadu Kooperativas (SEKoop), Eng. Arsénio Pereira da Silva, M.Agr., subliña katak kooperativa iha papél importante tebes iha sustenta moris ekonomiku povu nian. Tan ne’e, nia husu ba partisipante sira atu aproveita oportunidade formasaun ida-ne’e ho seriedade no responsabilidade.

“Formasaun ida-ne’e importante atu kapasita funsionáriu sira, nune’e bele dezenvolve kooperativa primária sira ho diak, hodi kontribui ba dezenvolvimentu ekonomia familiár,” hateten SEKoop.

Formasaun ida-ne’e partisipa husi funsionáriu nain 25 husi Sekretaria Estadu Kooperativas.

Iha serimónia abertura, marka prezensa mos husi Diretór Geral SEKoop, Eng. Olderico Lopes, Inspektór husi Gabinete Inspeksaun no Auditória (GIA), Gaspar Policarpo Correia, CEO CV OSFOR Damai Sejahtera, Putra Ayu Sita Laksmi, no kargu diresaun no xefia sira seluk.

#MédiaSEKoop#