Bobonaro, 12 Dezembru 2025

Sekretariu Estadu Kooperativas Eng. Arsénio Pereira da Silva, M.Agr fo Tamada de Posse ba Estrutura Kooperativa Multi-Setoral Kariedade no Fé (KAFE) no BIA-HAU iha Salaun World Vision, Suku Holsa, Postu Administrativu Maliana Vila, Munisipiu Bobonaro.

Iha nia intervensaun, Sekretáriu Estadu Kooperativas hateten katak governu iha papel importante atu fasilita no apoia dezenvolvimentu setor kooperativa, tanba kooperativa sira bele sai hanesan fonte rendimentu ba sustentabilidade família no komunidade, no mos kontribui ba kresimentu ekonomia nasional. Governu reafirma nia komitmentu atu kontinua halo fasilitasaun hodi hamosu no hametin movimentu kooperativa iha rai laran.

Nia mos akresenta katak kooperativa hanesan prinsipiu importante ida ne’ebé fundamenta ona iha Konstituisaun Republika Demokratika Timor-Leste, ne’ebé hateten katak kooperativa sai pilar importante ba dezenvolvimentu ekonomia nasional.

“Setor kooperativa presiza dezenvolve diak liu tan atu bele sai hanesan ai-rin ne’ebé fó kontribuisaun real ba ekonomia Timor-Leste. Ita hotu presiza konsiente katak kooperativa iha papel boot, tanba sira hala’o atividade ekonomiku, produsaun, no jere osan hodi bele aumenta rendimentu ba família sira no ba nasaun,” hateten nia.

Iha okazaun ne’e, Sekretáriu Estadu Kooperativas mos reafirma katak iha tinan ida ne’e Timor-Leste sai ona membru permanente iha ASEAN, hamutuk ho nasaun sira iha rejiaun Azia Sudeste. Iha konteksu ASEAN, kooperativa sira bele sai hanesan plataforma atu apoia malu no kolabora, la’ós atu kompetisaun de’it.

Antes remata, nia informa katak iha tinan oin Timor-Leste sei halo atividade kooperativa iha nivel ASEAN, ne’ebé sei konvida nasaun membru ASEAN hotu atu partisipa iha esposisaun kooperativa ne’ebé sei hala’o iha Timor-Leste.

Iha Serimonia Tomada de Posse ne’e mos hetan partisipasaun husi, Dirizentes SEKoop, Asesor Tekniku Estanislau Claúdio Ximenes, Reprezentante Presidente Autoridade Munisipiu, Reprezentante Komandante Polisia Munisipiu, Reprezentante World Vision no membru komperativas sira.

#Média_SEKoop2025