LIKISA,12/12/2025: Primeiru-Ministru Interinu, Eng. Mariano ASSANAMI Sabino, hamutuk ho Konsellu Kombatentes Libertasaun Nasional (CCLN Sigla Portuges), halot restu mortais saudozu funu nain sira hamutuk 50, iha Jardim Herois da Patria, Munisipiu Likisa.

Iha intervensaun, Primeiru Ministru Interinu, fó homenazen hodi hasa’e onra no gloria ba matires sira ne’ebe dedika an tomak mate hodi liberta rai ida ne’e, sira mate mak ohin loron ema hotu goza ukun rasik aan, maiske ohin loron ita sei enfrenta problema oi-oin, maibe ita nafatin orgullu nu’udar Timor-oan ne’ebe ukun rasik nia aan.

Luta naruk ne’ebe ita liu ona, Timor oan barak mate ohin loron balun ninia restu mortais seidauk hetan, balun ne’ebe konsege rekolla ona, maibe sei rai nafatin iha osoariu sira iha munisipiu, nu’udar Ministru Kordenador ba Assuntu Sosiais nian, orienta ona atu Ministeriu Kombatente da Libertasaun Nasional atu servisu hamutuk ho CCLN hodi halot ona saudozu sira nia restu mortais ho dignu nu’udar lutadores.

Liu husi momentu importante ne’e, PM Interinu dehan, saudozu sira mate ohin ita halot iha jardim entaun sira nia espiritu ne’e sei moris buras tun ba jerasaun sira nafatin ho espiritu lutador hodi kontinua lori rai ida ne’e ba oin.

Tanba ne’e, estadu Timor-leste mai ho vizaun ida katak, ema mak sai sentru ba dezenvolvimentu entaun ita komesa investe ba edukasaun oinsa lori edukasaun ne’ebe ho kualifikadu ba oan sira sai matenek hodi konkretiza mehi funu nain sira nian ba libertasaun povu husi kiak no mukit.

Hanesan Ministru Kordenador ba Assuntu Sosiais, durante ne’e sosializa makas oinsa oan sira komunga Prinsipiu haat ne’ebe importante ba hamentin estadu iha fuuru, mak foinsa’e sira tenke hatene kona-ba Prinsipiu Konstrusaun Paz, Konstrusaun Estadu, Konstrusaun Nasaun no Konstrusaun Karakter, hodi lori sira hatene prinsipiu ukun rasik aan nian no oinsa atu lori nasaun ne’e ba oin iha futuru.