DILI,11/12/2025: Embaixador Japaun iha Timor-Leste Tetsuya Kimura hasoru malu ho Primeiru Ministru Interinu, Eng. Mariano ASSANAMI Sabino, hodi hato’o agradesimentu hodi despede Governu Timor-Leste ne’ebe durante ne’e kolabora tebes hodi hala’o misaun hodi hametin relasaun Timor-Leste no Japaun liu husi apoiu ba dezenvolvimentu iha setor oi-oin.

Embaixador Tetsuya Kimura , hala’o nia misaun iha Timor-Leste hahu iha tinan 2022 to’o agora ho nune’e nia mandatu sei remata iha tinan ida ne’e.

Sorumutu ne’e, Primeiru Ministru Interinu, agradese ba Embaixador Tetsuya Kimura tanba durante ne’e hala’o nia misaun pro ativu hodi hala’o servisu koperasaun oinsa bele hametin relasaun diak entre povu rai rua ne’e.

“Lori povu tomak nia naran no Maun Boot Kay Rala Xanana Gusmão nia naran agradese ba Embaixador Tetsuya Kimura, maiske ninia mandatu remata ona, maibe Japaun nafatin kompromete apoiu ita nia dezenvolvimentu iha aspeitu oi-oin iha futuru,” dehan PM Interinu.

Durante nia misaun iha Timor-Leste konsege apoiu Timor-Leste nia dezenvolvimentu iha area Edukasaun, Saude, Infraestrutura bazika, agrikultura no sira seluk tan, ne’ebe fo duni benefisiu ba povu.