𝐄𝐑𝐌𝐄𝐑𝐀 𝟎𝟔/𝟏𝟐/𝟐𝟎𝟐𝟓 : Vise-Primeiru Ministru no Ministro Coordenadór ba Asuntu Sosiais, Eng. Mariano ASSANAMI Sabino, lidera lansamentu ofisiál programa “Moris Saudável” iha Aldeia Railakan, Suco Estado, Postu Administrativu Ermera.

Prezidente AMTL Dr. Herculano S. dos Santos Esp. Cardiologia hatete, lansamentu ne’e bazeia ba assinatura nota entendimentu entre MCAS no Asosiasaun Mediku Timor-Leste (AMTL) iha loron 26 Novembru 2025, no programa sei implementa durante tinan ida no possibilidade atu extende ba munisipiu seluk.

Programa ne’e la’ós de’it konsulta medika, maibé mos inklui edukasaun saúde, mensajen motivasaun, check-up ba estudante no profesór sira, hanesan mos konsulta espésializadu kona-ba labarik, ne’han, matan, fuan, no inan-isin rua. Iha parte sosial, programa fó oportunidade ba komunitaria atu participa iha jogu amizád no kompetisaun simples atu fó dinamika no promove kooperasaun.

Durante atividade, espésialista sira husi AMTL atende pasiente hamutuk 600 resin iha suco Estado hamutuk aldeia 7.

Tuir dadus, komunidade barak mak seidauk livre husi problema sira hanesan tensaun a’as, ran midar, moras fuan, malnutrisaun labarik, no mos indikasaun rematismu fuan.

“Ita bele trata moras, maibé barak liu importante mak prevene. Estilu moris no hanoin saudável mak base ba komunidade forte, moras mai tanba ita hanoin la diak no halo kostume ka han hahan ne’ebé la saudável. Ita tenke muda kultura ne’e atu ita bele moris naruk,” hatete Ministru.

Vise-PM, MCAS hatete, Governu ho AMTL inklui Ministériu Saúde sei kontinua extende programa “Moris Saudável” ba sentru-saúde sira iha munisipiu hotu nudar parte integradu husi kampaña nasional ba saúde preventiva.

“Atividade nee lao tanba ita servisu hamutuk ho Sentru Saúde Ermera, lideransa lokal no estrutura komunidade hatudu katak programa ne’e la’ós de’it inisiativa governu, maibé mos mobiliza komunidade atu sai parte ativa ba mudansa,” nia hatete.

Lansamentu iha Railakan akompaña husi Presidente AMTL Dr. Herculano Seixas dos Santos (Esp. Kardiologia), Sekretáriu Jeral AMTL Dr. Florindo Gomes, autoridade lokal, Konsellu Veteranus, profesionais saúde SSM Ermera, CHC Gleno, komunidade, profesór no estudante sira.

Komisaun organizadora ba programa ne’e kompostu husi Gabinete V-PM/MCAS, Diresaun Ezekutiva Nasional AMTL, AMTL Munisipiu Ermera, Serviço Saúde Munisipiu Ermera, Centro Saúde Gleno, Autoridade Lokál Suco Estado, Aldeia Railakan no EBF 186 Aitura.