Bobonaro (08/12/2025) : Grupo Hakiak Fahi “Haforsa Moris” iha Suku Ritabou, Aldeia Coroluli, Postu Administrativu Maliana, rai osan hamutuk liu $4.000. Grupo ne’e mak benefisiáriu husi Programa Ministeriu do Desenvolvimento Rural e Habitação Comunitaria (MDRHC), liu husi Sentru Dezenvolvimentu Aldeia (CDA).

Apoiu inisiu ba grupo ne’e ho total orsamentu $19.000, ne’ebé uza ba halo fahi luhan, sosa hahan fahi, no sosa fahi hamutuk 26. Fahi 3 mate, maibé grupo konsege fa’an ona hamutuk 14 no agora hela 9.

“Fahi uluk ami hola hamutuk 26. Tolu mak mate, no ami fa’an ona 14. Agora hela 9. Husi atividade fa’an fahi, ami hetan osan Grupo liu $4.000. Depois ami remata fa’an 9 ne’e, ami sei sosa fali atu kontinua atividade ida-ne’e,” hatete Benefisiaria Alzira Cardoso Danina

Nia mós hatete katak programa ida-ne’e fó esperansa foun ba familia sira iha Ritabou tanba ajuda muda situasaun ekonomika no fasilita sira atu atende nesesidade familia, inklui edukasaun oan sira nian.

“Ami kontenti los, tanba ami hakarak muda ami nia moris no selu oan sira nia eskola. Ami ama sira nia hakarak lolos no ami gosta mak programa hanesan ida-ne’e, tanba nia muda ami nia moris no ami gosta tan atu hakiiak barak liu,” hatete nia ho agradesimentu.

Programa apoio ba komunidade rural liu husi MDRHC no CDA mak parte hosi esforsu governu atu hadia ekonomia lokal, fortalese grupu-produtor sira iha aldeia, no aumenta produtividade familiar.

Susesu Grupo “Haforsa Moris” hatudu klaru katak investimentu ba agrikultura familiár bele simu fulan sai rendimento bo’ot no aumenta konfiança komunidade atu kontinua iha area produsaun ne’e.

Susesu grupo ne’e bele sai modelu ba grupu sira seluk iha postu no suku hotu atu kontinua inviste iha agrikultura sustentavel no produsaun animál.

Primeiru-Ministru Interinu, Eng. Mariano ASSANAMI Sabino, kontinua halo vizita ba grupo benefisiáriu kontinua no enkoraza sira atu nafatin iha vontade insveste iha Agrikultura, Hortikultura no Perkuaria hodi hahoris ekonomia lokal husi kraik.

Durante vizita, Ministru reforsa mos katak programa revitalizasaun komunitária mak sai prioridade atu fó dinamika foun ba aldeia sira iha asesu ba rendimentu ekonomika no auto sufisiénsia.