Dili, 15 Dezembru 2025 – Sua Exelénsia Ministra Edukasaun, Dra. Dulce de Jesus Soares, hamutuk ho Unidade Kurrikulu Nasionál, hala’o enkontru ho Sua Exelénsia Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano ASSANAMI Sabino hodi aprezenta rezultadu ezame nasionál, iha Sala Enkontru V-PM, Palásiu Governu.

Iha entrevista, Sua Exelénsia Ministra Edukasaun, Dra. Dulce de Jesus Soares, hateten, Ministériu Edukasaun liuhosi Unidade Kurrikulu Nasionál mai aprezenta ba Sua Exelénsia Sr. Vise-Primeiru Ministru kona-ba rezultadu ezame nasionál ba tinan 2025, atu hetan orientasaun ruma antes fó sai ba públiku. Tanba ne’e, ohin hetan ona aprovasaun no aban dadeer hakarak konvida média hotu-hotu atu bá iha Ministériu Edukasaun hodi halo konferénsia imprensa kona-ba avizu ba rezultadu ezame nasionál ba tinan ida-ne’e.

“Servisu importante liu maka Ministériu Edukasaun tenki hetan rezultadu di’ak ida ba estudante sira no atu fó enjerál de’it katak rezultadu tinan ida- ne’e hatudu iha avansu iha dezempeñu estudante sira, nune’e mós dezempeñu profesór sira, maibé husu ba profesór sira no mós ba komunidade edukativa liuliu ba inan-aman sira no estudante sira atu haka’as-an liután, nunee iha tinan oin bele iha rezultadu ne’ebé mak di’ak liután”, dehan S. E. Ministra Edukasaun.

Governante ne'e akresenta, ohin loron ami mai aprezenta no hetan koñesimentu husi Sua Exelénsia Sr. Vice -Primeiro Ministro, no hetan aprovasaun aban dadeer hakarak konvida média hotu-hotu iha Timor atu bá iha Ministériu Edukasaun atu halo konferénsia pers kona-ba avizu ba rezultadu ezame nasionál ne’ebé maka tinan ida-nee ita sei la aviza, maibé ita halo avizu ba mellores de’it inklui mós sei halo avizu ba hotu média husi dezempeñu estudante nian iha kada eskola.

Iha fatin hanesan, Sua Exelénsia Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano ASSANAMI Sabino, hateten, parte governu husu ba inan-aman, profesór no estudante sira, hotuhotu koopera, tanba iha estudante balun la pasa iha ezame nasionál. Karik balun laliu, ne’e parte ida atu esforsu-an atu tinan oin bele pasa, tanba edukasaun forma ema atu sai ema, liuliu iha dixiplina, respeita no esforsu.

“Ohin ami avalia ona katak, karik iha estudante ida ka rua laliu, ne’e mós dalabarak mai tuir de’it ezame, husu atu labele hanesan ne’e, tanba edukasaun forma ema sai ema, forma ema ho aspetu oin-oin, la’os atu hetan de’it valór, maibé forma ema atu iha dixiplina, ativa no aprende ho didi’ak. Karik balun laliu, ne’e parte ida atu esforsu-an atu tinan oin bele pasa”, dehan V-PM.

#MédiaME