Díli, 15 Dezembru 2025 – Sekretaria Estadu Kooperativas (SEKoop), liu husi Direção Nasionál Polítika Reforma no Kapasitasaun Jestaun Kooperativas (DNPRKGC) no Direção Nasionál Dezenvolvimentu Kooperativas (DNDC), hala’o atividade fasilitasaun ba Federasaun Multi-Kooperativa sira husi munisípiu 12, inklui Rejiaun Administrativu Espesiál Oecusse Ambeno (RAEOA), hodi prepara estabelesementu Konfederasaun Kooperativas iha Timor-Leste.

Sekretáriu Estadu Kooperativas, Eng. Arsénio Pereira da Silva, M.Agr., iha sesaun abertura, hato’o katak estabelesementu Konfederasaun Kooperativas importante tebes atu sai nu’udar mahon ba federasaun sira, hodi akumula Federasaun Multi-Kooperativa sira hotu, hodi fortaleze no dezenvolve movimentu kooperativa iha rai laran.

Tuir nia hateten, Konfederasaun Kooperativas sei sai nu’udar pontu ligasaun entre federasaun sira iha Timor-Leste no movimentu kooperativa iha rejiaun ASEAN nomos iha nivél internasionál, dalan ba kooperasaun, troka esperiénsia no hasa'e kapasidade jestaun kooperativa sira.

Sekretáriu Estadu Kooperativas mos husu ba dirijenti Federasaun Multi-Kooperativa sira atu hala’o diskusaun konstrutivu no objetivu, hodi hetan akordu no rekomendasaun sira ne’ebé bele sai hanesan base ba estabelesementu Konfederasaun Kooperativas dahuluk iha Timor-Leste.

Atividade preparasaun ne’e hala’o durante loron rua, hahu husi Segunda-feira to’o Tersa-feira (15–16 Dezembru 2025), ho partisipasaun dirijenti Federasaun Multi-Kooperativa sira husi munisípiu 12 inklui RAEOA, no mos Federasaun Nasional Kooperativa Kreditu Union Leno Dala (FENACU LENDA).

Seremónia abertura mos asiste husi Xefe Suku Kamea, Matos da Costa; Inspektór Gabinete Inspeksaun no Auditória, Gaspar Policarpo Correia; Diretór Nasionál Amadeu Lopes da Silva; Diretór Nasionál Gil Bento; no funsionáriu sira husi SEKoop.

#Média SEKoop#