Dili, 15 Dezembru 2025

Iha loron 15 fulan-Dezembru 2025, segunda-feira, ohin, sai nu’udár data ne’ebé fixadu hosi Governu liuhosi Ministériu bá Asuntus Kombatentes Libertasaun Nasionál (MAKLN), hodi hahú halo pagamentu faze da-huluk nian bá Kombatentes no família Mártir sira ne’ebé mak rejistadu iha segundu rejístu 2009.

Nune’e, Sua-Exelénsia Ministru bá Asuntus Kombatentes Libertasaun Nasionál, Gil da Costa Monteiro “Oan Soru”, husu bá Kombatentes no família Mártir sira atu ida-idak bele bá halo levantamentu ka “foti no dada osan” iha instituisaun finanseira ka banku ne’ebé mak sira pertense bá, tanba MAKLN sei transfere osan direta bá iha sira-nian númeru konta-bankária ne’ebé molok ne’e sira sumbete ona mai iha Diresaun Nasionál bá Pensaun no Subvensaun.

Prosedimentu sira kona-bá atu halo levantanmentu osan ne’e mak, benefisiáriu sira mai konfirma dadus iha DPNS, haruka tékniku sira impríme (print) fixa pagamentu nian no lori fixa ne’e bá iha banku ne’ebé sira loke konta bá, atu nune’e banku bele prosesa bá pagamentu.

Uainhira dokumentu komprovativu sira loos hotu ona, maka prosesu pagamentu tuir mai, benefisiáriu ida-idak bele bá ona halo levantamentu iha banku ne’ebé mak sira pertense bá, no la presiza ona mai iha ministériu.

Pagamentu ida-ne’e sei akomoda mós ho kontribuisaun fundu investimentu Veteranus nian.

IX Governu Konstitusionál liuhosi Ministériu bá Asuntus Kombatentes Libertasaun Nasionál (MAKLN) sei realiza prosesu pagamentu ida-ne’e to’o iha tinan 2026, no kada loron atende másimu ema na’in atus-hitu (700).

Governante ne’e husu bá Veteranus no Kombatente sira Libertasaun Nasionál nian inklui família Mártir sira atu kontinua hatudu dixiplina, mantein pás no hakmatek, hodi la’o tuir prosedimentu sira ne’ebé iha ona, tanba pagementu ida-ne’e sei kontinua to’o tinan oin 2026.

Tuir mai, hakarak mos fo sai fila-fali prazu sira ba "Prosesu Rekerimentu Pensaun no Prestasaun Pekuniária Únika bá Mártir no Kombatente Libertasaun Nasionál" nian hanesan iha aneksu:

Prazus;

1. Loron 13/01/2025 : Assinatura Editál Segundu Rejístu 2009 iha Sede CCLN iha Dili;

2. Loron 15/01/2025 to’o 14/03/2025 : Taka Editál sira iha Conselho Munisípal Combatente Libertação Nacional (CMCLN) – Conselho Munisipal dos CLN iha territóriu tomak no prazu atu hatama dadus ka kontesta CLN (60 dias);

3. Loron 01/04/2025 to’o 30/06/2025 : Rekere pensaun ka PPU no hatama dokumentu hotu bá funsionáriu sira hosi DNPS iha fatin CMCLN iha territóriu tomak (90 dias);

4. Loron 01/09/2025 : Taka lista iha sede CMCLN hotu-hotu ho rezultadu rekerimentu;

5. Loron 01/09/2025 to’o 31/10/2025 : Atu kompleta dokumentu ne’ebé uluk hatama iha prazu atu husu pensaun (60 dias);

6. Loorn 01/11/2025 : Taka lista rekerentu hotu-hotu aprovadu no la eleje bá pensaun ka PPU iha sede CMCLN;

7. Loron 01/11/2025 to’o 01/12/2025 : Atu reklama ka kontesta rekerente sira aprovadu ka la eleje bá pensaun ka PPU nian – Reklama bá DNPS (30 dias);

8. Loron 15/12/2025 : Primeira faze pagamentu, bá rekerente sira ne’ebé la hetan reklamasaun ka kontestasaun kona-bá herdeiru pensaun ruma;

9. Loron 27/12/2025 : Taka lista ho desizaun hosi DNPS kona-bá reklamasaun ka kontestasaun kona-bá herdeirus pensaun ne’ebé maka hatama;

10. Loron 27/12/2025 to’o 26/01/2026 : Atu reklama ka kontesta desizaun hosi DNPS kona-bá desizaun ne’ebé nia deside ona – Reklama bá Primeiru-Ministru (rekursu hierarkiku) (30 dias);

11. Loron 15/02/2026 : Segunda faze pagamentu, bá rekerente sira ne’ebé la simu reklamasaun ka kontestasaun ruma hosi rekursu hierarkiku

12. Loron 25/02/2026 : Taka lista ho desizaun hosi Primeiru-Ministru kona-bá reklamasaun ka kontestasaun maka hatama iha rekursu hierarkiku;

13. Loron 15/03/2026 : Terseira faze pagamentu, bá rekerente sira ne’ebé loloos liuhosi rezultadu rekursu hierarkiku;

Prosesu rekerementu hotu no pagamentu pensaun ka PPUN bá kombatente no família hosi mártir hotu, gratuítu (gratis).

(𝐌𝐞́𝐝𝐢𝐚 𝐆-𝐌𝐀𝐊𝐋𝐍)