Dili, 15 Dezembru 2025

Sua-Exelénsia Ministru bá Asuntus Kombatentes Libertasaun Nasionál, Gil da Costa Monteiro “Oan Soru”, iha Segunda-feira, loron 15 fulan-Dezembru tinan 2025, tuku 17:45, oras lorokraik, konvoka enkontru ida ho ekipa tékniku sira iha Diresaun Nasionál bá Pensaun (DNPS) iha sala enkontru Gabinéte MAKLN, Comoro-Dili.

Enkontru ne’e hodi haree no halo avaliasaun fila-fali bá mekanízmu sira atendimentu nian ne’ebé tékniku sira ne’e oferese bá Veteranus no Kombatentes inklui família Mártir sira durante loron primeiru iha ámbitu abertura pagamentu pensaun veteranus faze da-huluk nian, Segunda (15/12/2025).

Rezultadu hosi enkontru ne’e, desizaun fórum deside katak, atendimentu tenke la’o tuir nafatin oráriu ne’ebé mak estabelese ona, no tékniku sira kontinua rigor iha identifikasaun bá dokumentu inklui identidade hosi benefisiáriu ne’ebé atu simu pensaun, nune’e mós ema ne’ebé reprezenta atu foti osan ne’e, tenke ema ne’ebé mak lo-loos. Katak, ema ne’ebé sai rekerente atu foti osan ne’e, labele iha fali substituisaun hosi ema seluk.

MAKLN liuhosi DNPS husu bá benefisiariu sira ne’ebé atu halo levantamentu bá sira-nia osan ka pensaun Veteranu nian, tenke liuhosi DNPS, hatudu Kartaun Eleitoral ho Billete Identidade orijinál, hafoin foti fixa pagamentu nian nu’udár dokumentu komprovativu, no lori fixa ne’e bá aprezenta iha banku komérsial sira ne’ebé sira loke konta-bankária bá, atu nune’e bele halo levantamentu bá sira-nia osan.

Iha loron da-huluk pagamentu pensaun Veteranus iha primeira-faze ne’e, Tékniku DNPS konsege atende ema hamutuk atus-haat (400).

Sorumutuk avaliasaun ne’e, lidera direta hosi Sua-Exelénsia Ministru “Oan Soru” ho Sua-Exelénsia Sekretáriu Estadu Veteranus, Cesar dos Santos da Silva “Merak”, no partisipa hosi Diretór Nasionál bá Pensaun no Subvensaun (DNPS), Manuel dos Santos Araújo inkuli Xefia sira seluk iha DNPS ho Tékniku sira.

Durante enkontru, Governante na’in-rua hetan akompañamentu hosi Xefe Gabinéte MAKLN, Nilton Ximenes das Neves ho Asesór Jurídiku, Alcino Soares Gomes.

(𝐌𝐞́𝐝𝐢𝐚 𝐆-𝐌𝐀𝐊𝐋𝐍)