Dili, 16 Dezembru 2025

Iha loron 16 fulan-Dezembru tinan 2025, ohin, prosesu pagamentu pensaun Veteranu nian bá Kombatentes no família Mártir sira iha faze da-huluk nian, hakat ona bá loron da-ruak.

Nune’e, iha atendimentu bá loron da-ruak ida-ne’e, Ministériu bá Asuntus Libertasaun Nasionál (MAKLN), liuhosi Diresaun Nasionál bá Pensaun no Subvensaun (DNPS), hamutuk ho Conselho dos Combatentes da Libertação Nacional (CCLN), kontinua atende benefisiáriu sira tuir prosesu normál ho baze bá lei, maibé, husu bá nafatin públiku atu obedese bá regra sira liu-liu oráriu ne’ebé estabelese ona tuir kada munisípiu.

Atu ajuda liután públiku hodi komprende kona-bá prosesu bá hetan pagamentu hosi pensaun Veteranus nian, bele haree hamutuk resposta balu iha kraik ne’e;

1. Tanba sá tenke mai konfirma fixa pagamentu antes atu bá Banku hodi halo levantamentu pensaun? Iha periodu ida ne’e atu konfirma didiak pensionista sira nia dadus pessoal no hasai fali fotografia aktualizadu hodi muda estatutu nudar rekerente ba benefisiariu pensaun.

2. Tanba sá rekerente mak tenke mai rasik iha baze dadus? Tanba nia mak nu’udár rekerente no bele sai benefisiáriu. Ezemplu, Rekerente pensaun sobrevivénsia oan nain ida mak rekere, maibé iha periódu pagamentu oan sira seluk hakarak hotu sai benefisiáriu. Entaun sira tenke mai hodi konfirma antes impríme (print) fixa pagamentu. Kazu falesimentu husi Rekerente ninia kaben no oan, iha parte seluk tanba rajaun idade Kombatentes barak iha mudansa fizikamente bá sira nia oin, tanba ne’e tenke hasai fali foto atualizadu, nune’e bele ajusta ho fotográfia rejístadu iha sistema baze dadus. Prosesu ida-ne’e atu evita parte terseiru (brokers), benefisiáriu ilejítimu, no falsifikasaun dadus pensionista.

3. Oinsa ho Rekerente sira ne’ebé ho kondisaun Moras, labele prezensa? Rekerente sira ne’e família sei mai informa bá CCLN tuir munisípiu nune’e ekipa téknika husi MACLN no Banku bele bá sira nia fatin hodi halo ajustamentu dadus.

4. Bele ka lae, Banku halo pagamentu pensaun direita? Labele! Tanba bazeia bá akordu koorperasaun (memorandum of Understanding) ne’ebé assina husi Banku no Ministériu, kritériu pagamentu mak tenke aprezenta fixa pagamentu nu’udár evidénsia husi benefisiáriu pensaun.

Atu informa tán katak, prazu bá konfirmasaun benefisiáriu pensaun laiha limete, no sei kontinua atende to’o na’in sira rasik mai konfirma.

Faze Prosesuál ne’e hahú husi Rejístu, tuir verifikasaun, taka sai lísta editál, aprezentasaun rekerimentu no agora dadaun konfirmasaun benefisiáriu, ikus-liu bá halo levantamentu pensaun iha Banku.

Governu liuhosi MAKLN hamutuk ho CCLN inklui funsionáriu no tékniku sira kontinua halo esforsu, hodi atende hotu kedas benefisiáriu sira, atu bele hetan mós direitu tuir lei, tanba hosi ema hamutuk 15.697 ne’e, hotu-hotu sei hetan direitu ne’ebé mak hanesan, importante mak dixiplina hodi manteña situasaun ne’ebé pás, nune’e bele kontribui bá susesu komún.

(𝐌𝐞́𝐝𝐢𝐚 𝐆-𝐌𝐀𝐊𝐋𝐍)