DILI,15/12/2025: Primeiru-Ministru Interinu, Eng. Mariano ASSANAMI Sabino, ne’ebe reprejenta Xefe Governu, Kay Rala Xanana Gusmão, enkontru ho Superiores Polisia Nasional Timor-Leste (PNTL), hodi troka hanoin no enkoraza sira atu kontinua servisu hodi garantia seguransa ba ema hotu-hotu ho professional.

Nu’udar Primeiru Ministru Interinu ohin mai vizita superiores PNTL hahu husi Komandante Jeral to’o komandu munisipiu sira hotu ho hanoin ida katak, ohin dadaun ne’e ita iha ona fulan ikus tinan 2025 nian entaun mai para fo korazen no rekoñese PNTL nia dezempeñu servisu durante ne’e maske hasoru situasaun oi-oin maibe servisu lao diak ho professional.

Alende ne’e, dadaun ita besik ona Natal no Tinan Foun lori Xefe Governu nia naran hodi husu ba PNTL hahu husi nasional tun ba Munisipiu to’o polisia organiku sira iha suku atu kontinua nafatin servisu hakbesik an ba povu oinsa sira hotu bele kontribui ba paz no estabilidade hodi simu loron importante ne’e.

“Ita hotu hatene PNTL ne’e liman ain povu nian, sira mos ema, iha familia tamba ne’e husu ita hotu-hotu kontribui ba paz no estabilidade, ita la devia fo fali sevisu extra ida ba sira, tanba sira mos ema iha mos familia atu goza loron importante ne’e,” dehan PM Interinu.

Xefe Governu Interinu ne’e, hatete, PNTL sira dadaun ne’e iha limitasaun sira labele kobre fatin hotu-hotu atu asegura seguransa, entaun komunidade mak hotu-hotu tenke ho konsensia atu garante paz tanba paz no estabilidade ne’e mai husi ita ida-idak nia aan rasik.

Alende fo orientasaun ba PNTL atu asegura loron boot Natal no Tinan foun,

Ita mos koalia kona-ba promosaun ba Diviza sira PNTL nian hodi loke dalan ba rekrutamentu foun ne’ebe ninia prosesu ohin loron la’o dadaun hodi hein tempu nune’e anunsia nia rezultadu ba publiku.