Enkontru ne’e reforsa relasaun kle’an ne’ebé halibur nasaun rua ne’e no destaka importánsia atu mantein diálogu polítiku regulár, tantu iha ámbitu CPLP no iha kooperasaun bilaterál.

Lisboa, 09 Dezembru 2025 – Sua Exelénsia, Vise-Ministru Asuntu Parlamentár Prezidénsia Konsellu Ministru Timor-Leste nian, hala’o vizita ofisiál iha loron 9 Dezembru 2025, ba Sua Exelénsia, Ministru Asuntu Parlamentár Portugál nian, hodi reafirma importánsia istórika entre instituisaun no instituisaun rua ne’e.

Enkontru ne’e fó dalan ba interkámbiu luan ida kona-ba oinsá relasaun Governu no Parlamentu funsiona iha Portugál, hodi destaka papél sentrál Ministériu Asuntu Parlamentár nian iha koordenasaun polítika, ligasaun institusionál, no jestaun relasaun entre ramu podér rua ne’e.

Delegasaun ne’e ko’alia mós kona-ba Portugal nia knaar iha CPLP nia laran no kontribuisaun ne’ebé nasaun rua ne’e bele halo hodi dinamiza inisiativa parlamentar no governamentál sira iha mundu luzófonu.

Análiza mós área sira ho interese komún iha nível internasionál, nomeadamente Timor-Leste nia partisipasaun ativu iha CPLP no ASEAN.

Membru Ezekutivu Portugál ne’e repete ninia vontade atu aprofunda diálogu no koopera iha reforsu kapasidade institusionál Timor-Leste nian, sublinha mos importánsia husi parseria bilaterál no kompromisu atu promove inisiativa konjunta sira ne’ebé kontribui ba estabilidade, efisiénsia, no kualidade governasaun demokrátika.

Portugál mós reafirma ninia kompromisu: atu kontinua serbisu sorin-sorin ho Timor-Leste hodi harii futuru ida ne’ebé forte liután no kooperativu liután.

Vizita ne’e reforsa lasu istóriku, polítiku no kulturál ne’ebé halibur Timor-Leste no Portugál, no konstitui pasu signifikativu seluk hodi aprofunda kooperasaun bilaterál no amizade sólidu entre nasaun rua ne’e. (©MediaGVMAP)

Fontes; Vise-Ministru Asuntu Parlamentár Prezidénsia Konsellu Ministru Timor-Leste hala’o Enkontru bilaterál ho Ministru Asuntu Parlamentár Portugál | Portal GVMA