Lisboa, 09 Dezembru 2025 – Hanesan parte ida husi ninia vizita ofisiál ba Portugál, Sua Exelénsia Vise-Ministru Asuntu Parlamentár Prezidénsia Konsellu Ministru Timor-Leste simu  husi Sua Exelénsia Vise-Prezidente Asembleia Repúblika Portugál, Dr. Rodrigo Saraiva iha audiénsia ne’be hala’o iha loron tersa, 09 fulan-Dezembru 2025. Enkontro refere hala’o iha Palásiu São Bento, sede Parlamentu Portugál nian, Ida-ne’e reflete importánsia ne’ebé nasaun rua ne’e fó ba diálogu polítiku no hametin instituisaun demokrátiku sira.

Enkontru ne’e fó dalan atu halo análize detalladu ida kona-ba funsionamentu Asembleia Repúblika nian no fó diálogu nakloke ida kona-ba dezafiu no oportunidade sira ne’ebé sistema parlamentár timoroan hasoru. Aleinde troka esperiénsia institusionál sira, aborda mós área prioritária sira hosi kooperasaun bilaterál entre Timor-Leste no Portugál, ho énfaze iha edukasaun, formasaun ba pesoál sira, no promosaun no konsolidasaun lian portugés nian.

Exelénsia, Vise-Prezidente Asembleia Repúblika hato’o nia vontade tomak atu hametin kooperasaun ho Parlamentu Nasionál Timor-Leste, hodi subliña importánsia atu aprofunda lasu institusionál sira entre nasaun rua ne’e.

Nia subliña relevánsia hosi inisiativa sira ne’ebé promove lasu besik liu entre reprezentante sira ho estrutura parlamentar sira, nune’e mós asaun sira ne’ebé permiti troka bei-beik esperiénsia no prátika di’ak sira. Nia subliña mós papél esensiál hosi diplomasia parlamentár hodi hametin relasaun bilaterál sira no aprofunda lasu istóriku sira entre povu rua ne’e.

Husi nia parte, Sua Exelénsia Vise-Ministru Dr. Aderito Hugo da Costas destaka mos kompromisu Governu Timor-Leste nian hodi reforsa kualidade prosesu lejizlativu no hametin artikulasaun entre órgaun soberania sira nian, hodi rekoñese Asembleia Repúblika nu’udar referénsia ba maturidade institusionál no fonte aprendizajen privilejiadu ba modernizasaun parlamentu timoroan nian.

Enkontru ida ne’e aborda mós tema sira ho interese komún iha ámbitu CPLP nian, no mos diskute liu tan kona-ba dinámika prezensa internasionál Timor-Leste nian no importánsia hosi diálogu kontínuasaun ho parseiru luzófonu sira, i subliña mos katak nia partisipasaun tomak iha espasu ASEAN nian reprezenta oportunidade estratéjiku ida hodi hametin no projeta nasaun luzófonu sira iha rejiaun Asia nian.

Sorumutu ne’e hala’o iha ambiente ne’ebe kordialidade no kooperasaun, reforsa mos amizade duradoura entre Timor-Leste no Portugál, no loke dalan foun ba aprofundamentu relasaun inter-parlamentár, interkámbiu institusionál, no kooperasaun polítika entre nasaun rua ne’e. (©MediaGVMAP)

Fontes: Vise-Ministru Asuntu Parlamentár Prezidénsia Konsellu Ministru Timor-Leste hala’o enkontru Bilaterál ho Vise-Prezidente Asembleia Repúblika Portugal | Portal GVMAP