Díli-Sesta 12/12/2025 S.E Ministra Finansas Sra. Santina José Rodrigues F. Viegas Cardoso, akompaña husi Xefe Gabinete Sra. Brígida da Silva, realiza serimonia asina akordu subvensaun entre Banku Dezenvolvimentu Aziatiku (ADB-sigla ingles) no governu Repúblika Demokrátika Timor-Leste ho montante millaun $3 ba projetu dezenvolvimentu abilidade forsa traballu.

Durante diskursu S.E Ministra Finansas Sra. Santina José Rodrigues F. Viegas Cardoso, destaka, foku husi projetu ida ne’e hametin kualidade no relevansia husi edukasaun no formasaun téknika no vokasionál maka sentrál ba ita-nia estratéjia ekonómika ne’ebé luan liu, ami nia komprimisu la’ós de’it atu harii infraestrutura fizika, maibé mós atu hadi’ak forsa traballu timoroan iha kapasidade bele dezeña, jere no sustenta dezenvolvimentu no ajuda diversifika ita-nia ekonomia.

Tanba ne’e asinatura ohin nian liufali formalidade prosesuál ida, ne’e maka komprimisu ne’ebé fahe atu fornese ba ita-nia foinsa’e sira abilidade, oportunidade no konfiansa ne’ebé sira atu harii sira-nia futuru.

Iha biban ne’e mós country director Banku Dezenvolvimentu Aziatiku Sra. Stefania Dina hateten, ho investimentu dolar millaun tolu ne’ebé sei implenta iha tinan haat nia laran, parseria ida ne’e sei hametin edukasaun no formasaun teknika no vokasionál, hadi’a fasilidade no ekipamentu iha instituisaun prinsipál hirak nian no fornese formasaun abilidade relevante ho industria ba foinsa’e hamutuk liu rihun rua atus lima kada tinan, inklui feto no grupu marjinalizadu sira.

Serimonia asina akordu ne’e hala’o iha sala auditorium Ministériu Finansas Aitarak-laran, hetan prezensa masimu husi Embaixadór Japaun Sr. Kimura Tetsuya, reprezentante Ministra Edukasaun, diretór jerál Edukasaun Jerál Sr. Deolindo da Cruz, INDMO, SEPFOPE no liña ministériu relevante sira.

Fontes: https://www.facebook.com/share/p/1ARBV13vCN/