Dili, 16 Dezembru 2025 – Ministériu Agrikultura, Pekuária, Peskas no Floresta (MAPPF) simbolikamente intrega ekipamente agríkola modernu, inklui fini modo, ai-oan, batar no hare kulit bá agrikultór munisipiu sira liu-husi Diretór Servisu Agrikultura Munisipál (DSAM) iha resintu MAPPF Comoro - Dili

Ministru Agrikultura, Pekuária, Peskas no Floresta (MAPPF), Eng. Marcos ”MAMETA” da Cruz, MAgSt hateten atividade distribuisaun ekipamentu agríkola modernu, fini no vivieurs ai-oan sira bá Diretór Servisu Agrikultura Munisipál (DSAM) ne’e hanesan simbolikamente de’it. Tanba sasán sira ne’e sei fasilita agrikultór sira hodi utiliza no kuda iha sira ninia to’os atu bele hasa’e produsaun iha futuru.

“Ohin sibmolikamente ita intrega hela sasan sira n’ebé ita sei bele fasilita ita nia agrikultór sira iha baze atu sira bele ajuda aumenta produsaun iha ita nia rai”. Dehan Ministru Marcos da Cruz depois intrega tiha makina no fini bá dirijente sira.

Nia hateten fini sira ne’ebé maka MAPPF distribui ho simbolikamente hanesan fini batar, fini hare no fini modo no fini ai-oan liu-husi dirijente agrikultura nian iha kada Munisípiu ne’e tanba agora daudaun tama ona iha tempu udan, fini sira ne’e fahe bá area sira ne’ebé potensiál atu komunidade agrikultór sira bele kuda hodi hasa’e liu-tan produsaun.

Iha mós ekipamentu ne’ebé Ministériu distribui ho intensaun atu dezenvolve setór agrikultura ho Sistema mekanizasaun. Ne’e duni tactór, mákina kuda hare, mákina koa hare, no mákina baku hare mákina sira ne’e sei fasilita agrikultór sira hodi redus tempu servisu hodi bele halais liu-tan servisu iha natar.

Ministru ne’e mós husu bá dirijente sira hotu atu servisu hamutuk ho di’ak liu-tan atu bele fasilita agrikultór sira ho ekipamentu ho fini ne’ebé mak governu liu-husi Ministériu intrega ne’e. hanesan responsabilidade máximu iha Ministériu ne’e, nia apresia servisu no apoiu tomak ne’ebé kada diresaun sira halo ona. Durante tinan 2 servisu hamutuk mezmu seidauk halo buat barak maibé bele dehan iha progresu, iha mudansa iha dezenvolvimentun iha setór agrikultura.

“Ha’u husu ita servisu hamutuk, bá oin ita bele halo jestaun ida di’ak bá ekipamentu sira ne’e hodi bele halo kontrola liu-husi Sistema monitorizasaun no avaliasaun tuir mai”. Tenik Ministru

Portantu ekipamentu agríkola modernu ne’ebé praparadu ona atu distribui bá komunidade agrikultór sira maka hanesan tractor mediu unidade 25, mákina kuda hare (Rice planter) unidade 71, mákina kolleta ou koa hare unidade 47, hand tractor unidade 300 no mákina baku hare unidade 51. Iha mós fini ne’ebé distribui bá agrikultór sira maka hanesan fini hare nakroman 149,6 toneladas, fini hare Impare 100 tonelada, fini batar sele 70,780 tonelada, fini batar noi mutin 31,780 tonelada, fini forerai 4.440 tonelada, fini foremungu 3.990 tonelada, fini modo 1587,900 tonelada

Iha mós adubu pop nasa 6000 tonelada, adubus super nasa 5000 tonelada adubus Harmonik 8000 tonelada inklui viveirus ai-oan 19,950 mak hanesan Rambutan 4000 pes, Durian 1.800 pes, Sabraka Tangerina 4000 pes, Salak 3000 pes, no has Grafting 700 pes.

Iha serimonia ne’e hetan mós partisipasaun husi Sekretáriu Estadu Pekuária (SEP), Diretór Jerál Agrikultura Kafé Plantas no Indústria, Diretór Nasionál Hortikultura, Diretór Nasionál Extensaun, Diretór Agrikultura Munisipál sira, Xefe Departamentu, extensionista sira husi kada suku iha Munisípiu no funsionáriu MAPPF sira.