Dili, 11 Dezembru 2025 - Sekretáriu Estadu Terras no Propriedades (SETP), Sr. Jaime Xavier Lopes, M.Eng. hala'o abertura ba enkontru avaliasaun anuál ba servisu terras propriedades 2025 nian.

Atividade avaliasaun ne'e rasik organiza hosi Diresaun Jeral Terras no Propriedades hodi halo avaliasaun ba servisu terras no propriedades nian tantu iha Nivel Nasional no Munisipiu.

Molok Abertura, Diretor Jeral Terras no Propriedades (DGTP), Dr. Lucas António da Costa informa iha tinan kotuk DGTP laiha avaliasaun anual, maibé iha tinan ida-ne'e DGTP deside realiza avaliasaun anual hodi bele haree progressu servisu sira kona-ba Terras Propriedades nian durante tinan 2025 nian.

"Ita hatene katak tinan-tinan, Diresaun Jeral Terras Propriedades hala'o avaliasaun par sukat no haree avalia ita nia servisu ne'ebé hala'o iha tinan tomak 2025," Katak DG Lucas.

Nia dehan, enkontru avaliasaun ne'e sei hala'o durante loron rua, no iha loron primeiru sei hala'o loron tomak no sei halo deskusaun no aprezenta faktu sira atu atinji rezultadu ne'ebe di'ak hodi lori ba iha enkontru nivel nasional iha Konsellu Konsultivu ne'ebé mak sei lidera hosi Ministru Justisa no Sekretáriu Estadu.

Tuir nia, enkontru ne'e importante tebes, tanba Diretor sira hahú ohin to'o aban sei aprezenta sira ninia progressu, dezafius, obstáklu, nune'e bele buka nia solusaun, hodi hadi'a iha 2026.

Fatin hanesan Sekretáriu Estadu Terras no Propriedades, hatete enkontru avaliasaun ida-ne'e sai oportunidade ba kargu xefia sira kada munisipiu inklui Diresaaun Nasional sira hanesan DNTP, DNSC no DNIG atu tau hanoin hamutuk, hodi mellora servisu sira ka planu sira ne'ebé atu bele realiza iha 2026.

"Atu dehan de'it katak saida mak imi planu tiha ona atu halo iha 2026 ho saida mak imi halo tiha ona atu nune'e imi debate hodi fo solusaun atu mellora ita nia servisu ba iha 2026, servisu hotu la'o hela la'os ladi'ak maibé ita atu mellora servisu sira ne'e sai kapas, planu ne'ebé orsamentu tau tiha ona ne'e bele ezekuta,"Dehan SETP.

Governante ne'e afirma, esforsu sira ne'ebé hala'o tiha ona hahú hosi Munisipiu sira tanba ho planu ba dezentralizasaun no se karik halo ona dezentralizasaun ne:e signifika katak iha kada Munisipiu sira tenke hatama reseita ne'ebe as oituan liliu mak Munisipiu Dili.

"Ha'u haree iha munisipiu Likisa, Baukau, Suai mak hatama reseita makas maibé ida-ne'e de'it seidauk naton, se karik rai sira estadu nian ita tau ona osan par monta tiha estaka hotu no plaka (kuadru) ida par tau iha ne'eba, tau rai ne'e nia luan hira ou naruk hira, depois tau ho mapa ida, entaun ida-ne'e iha buat ida mak importante tebes atu nune'e kuandu investor sira mai presiza rai mamuk ruma ne'e ita nia informasaun ba sira klaru e sira ba mos sira haree deit mapamentu ida taka iha ne'ebá,"afirma nia.

Tanba ne'e, Membru Governu ne'e husu atu enkontru avaliasaun ida-ne'e kada dirijente, kargu xefia no funsuinariu sira bele ko'alia ba nune'e hamutuk hodi hadi'a no buka solusaun.

"Karik xefe ruma manda mak la tuir regras ruma karik fo hatene de'it, ko'alia, labele nonok, se imi la koalia mak sira mos lahatene se kuandu imi ko'alia sira mos hatene ona karik aban bainrua manda tan karik sira mos hatene ona, maibé felismente prosesu ida atu lori Terras Propriedades ba oin ne'e ita tenke servisu hamutuk, hahú hosi funsionáriu to'o kargu xefia sira, see la'e ita halo buat ida labele ba on,"Nia Salienta.

Mídia SETP

Fontes: https://www.facebook.com/share/p/19FRdRn793/