Dili, 11 Dezembru 2025 - Sekretáriu Estadu Terras no Propriedades (SETP), Sr. Jaime Xavier Lopes, M.Eng. simu vizita ofisiál ida hosi Ekipa Asean Federation of Land Surveying and Geomatics (AFLAG) iha Gabinete SETP, Bebora.

Ekipa AFLAG ne'e lidera hosi Sr. Shaharuddin Musa hanesan mos Presidente ba Association of Authorised Land Surveyors Malaysia (PEJUTA).

Iha vizita ne'e ekipa AFLAG aprezenta mos objetivu sira kona-ba halo vizita ofisial ida-ne'e ba Sekretáriu Estadu Terras no Propriedades.

Tuir Sr. Shaharuddin Musa katak ekipa AFLAG ninia vizita ofisial ne'e atu mai halo estudu no análiza liliu konparasaun kona-ba sistema Geospasiál Timor-Leste nian, tanba AFLAG haree katak ho adezaun Timor-Leste ba ASEAN hatudu ona rezultadu final iha fulan kotuk, no Timor-Leste agora sai ona nuudar Membru ASEAN entaun AFLAG foti inisiativu ida ne'e hodi mai halo estudu no komparasaun ba sistema Geospasial iha Timor-Leste ho Sistema Geospasial sira ne'ebé ohin loron membru ASEAN sira adpota ne'e.

Ejisténsia AFLAG ne'e ho Objetivu

1. Promosaun no avansus sênsia, prátika no aplikasaun levantamento rai no geomatika ba benefisiu umanidade.

2. Halo servisu hamutuk ho organizasaun nasional no internasional, no suporta sira nian servisu relasionadu ho levantamento rai no geomatika iha ASEAN.

3. Enkoraza troka entre instituisaun, organizasaun no entidade sira ne'ebé iha responsabilidade ba prátika levantamento rai no geomatika.

4. Fahe no divulga informasaun kona-ba levantamento rai, geomatika no asuntu relasionadu ne'ebé afeta profisaun.

5. Elevasaun téknika no sêntifika membru sira hodi enkoraja no koordena peskiza iha levantamento rai no geomatika.

6. Eduka no hakarak atu hadi'a, estenda no eleva konhesimentu sêntifika, téknika no jerál membru no ema sira ne'ebé konsernidu ho levantamento rai no geomatika.

Iha biban ne'e, Sekretáriu Estadu Terras no Propriedades, hato'o agradese wain ba ekipa AFLAG ne'ebé foti ona inisiativa hodi mai vizita Terras Propriedades hodi bele haree sistema Geospasial iha Timor-Leste.

Governante ne'e mós informa ona ba Diresaun Nasional Informasaun no Geospasiál (DNIG) hodi bele simu ekipa ALFAG hodi halo analiza no estudu ba sistema Informasaun no Geospasial Timor-Leste nian. Mídia SETP

Fontes: https://www.facebook.com/share/p/1BwabL6omi/