𝐂𝐨𝐯𝐚𝐥𝐢𝐦𝐚, 𝟏𝟏 𝐃𝐞𝐳𝐞𝐦𝐛𝐫𝐮 𝟐𝟎𝟐𝟓: Sekretáriu Estadu Dezenvolvimentu Lokál (SEDL), Mateus W. dos Santos Tallo, akompaña Ministru Administrasaun Estatal, Tomas do Rosário Cabral, no Vise-Ministru ba Fortalesimentu Institusionál, Paulo Manuel da S. dos Remédios, Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, hamutuk ho Reprezentante UNDP, halo lansamentu ba funsionamentu Balkaun Úniku iha Munisipiu Covalima.

Dekretu Lei Nu.49/2023 hatu'ur Balkaun Úniku nu’udar servisu deskonsentradu ida iha Diresaun Jerál Simplifikasaun, Modernizasaun, no Administrasaun Lokál (DGSMAL) ne’ebé tutela iha Ministériu Administrasaun Estatal. Nune’e mos iha DL. Nu.3/2025 iha DG-SMAL sei asegura instalasaun servisu Balkaun Úniku no halo mós jestaun ba servisu BÚ iha territoriu nasionál hotu. Balkaun Úniku mak sentru servisu atendimentu iha nível lokál iha ne’ebé sidadaun ida-idak bele hetan asesu ba informasaun no asesu ba servisu públiku ne’ebé la hanesan iha fatin ida de’it, nune’e bele poupa tempu no poupa osan.

Oras ne’e dadauk Balkaun Úniku estabelese ona iha munisipiu walau,(8): Manatuto, Baucau,Dili, Liquiça, Aileu, Manufahi, Autoridade Administrativa Ataúro no ohin loron inaugura tan Balkaun Úniku munisipiu Covalima.

Iha tempu badak sei inaugura mós Edifisiu Balkaun Úniku RAEOA inklui munisipiu sira seluk mak hanesan munisipiu Viqueque, Lautem, Ainaro, Ermera no Bobonaro.

Balkaun Úniku hanesan mekanizmu ida husi promosaun ba prosesu desentralizasaun ne’ebé espanda tan prestasaun servisu ba atendimentu públiku, hamenus burokrasia hasa’e transparensia, satisfasaun no konfiansa ba administrasaun públika.

Inisiativa ida-ne'e aliña ho esforsu desentralizasaun IX Governu Konstitusional nian iha Balkaun Úniku ne’ebé eziste ho objetivu tolu mak hanesan: Hakbesik prestasaun servisu ba sidadaun sira; Moderniza no simplifika servisu atendimentu ba públiku ho lalais no fasil; no Promove transparensia no boa governasaun.

Balkaun Úniku, ezíste atu promove transparénsia iha servisu administrasaun públika. No sai mós fonte kredível ba konfirmasaun informasaun sidadaun no munisipál iha kada territóriu. Ba ezisténsia Balkaun Úniku, realiza tanba servisu hamutuk entre Governu da-IX liu husi Ministériu Administrasaun Estatál hamutuk ho UNDP.

Iha serimónia inaugurasaun BÚ ne'e partisipa hosi Prezidente Autoridade Munisipiu Covalima Miguel Armada Cardoso, Diretores Jerais no Nasionais MAE, Diretores Servisus Munisipais, Administrador Postu Administrativu, Veteranus, Autoridade Seguransa PNTL, lider komunitáriu sira no komunidade Covalima.

Fontes: https://www.facebook.com/share/p/1Hj7HfHgpm