𝗗Í𝗟𝗜, 𝗠𝗝 — 𝗦𝗲𝘀𝘁𝗮-𝗳𝗲𝗶𝗿𝗮, 𝟭𝟮 𝗳𝘂𝗹𝗮𝗻 𝗗𝗲𝘇𝗲𝗺𝗯𝗿𝘂 𝟮𝟬𝟮𝟱, Sua-Eselénsia Ministru Justisa, Dr. Sérgio de Jesus Fernandes da Costa Hornai, fó perspetiva kona-ba avaliasaun dezenpeñu servisu Diresaun-Jerál Terras no Propriedades (DGTP sigla portugés), Ministériu Justisa, iha kontestu refleksaun ba períodu Natal hamutuk no preparasaun simu Tinán Foun, ne’ebé hala’o iha sala edifísiu Diresaun Cadastro Nasional, Balide, Díli.

Avaliasaun dezenpeñu servisu ida-ne’e, realiza ho objetivu atu avalia grau kumprimentu ba funsaun, atribuisaun no obrigasaun legál ne’ebé atribui ba Diresaun-Jerál Terras no Propriedades, tuir dispozisaun lei aplikável, hodi garante efisiénsia, legalidade no transparénsia iha prestasaun servisu públiku kona-ba administrasaun Terras no Propriedades.

Sua-Eselénsia Ministru Justisa fundamenta, prosesu avaliasaun ida-ne’e reveste importánsia jurídika no administrativu, tanba permite identifikasaun lakuna institusionál, aperfeisoamentu mekanizmu implementasaun politika públika, no reforsu kapasidade hodi bele garante seguransa jurídika no protesaun efetiva ba direitu sidadaun sira nian.

Iha kontestu ne’e, Ministru Justisa fó orientasaun ba Diretor Jeral, Nasional no funsionáriu sira DGTP, atu kontinua kumpre prinsipiu legalidade, boa governasaun, responabiliza ba servisu públiku, hodi prepara hasoru dezafiu iha terras no prioridade ba iha tinán foun.

Ministériu Justisa kontinua halo supervisaun, avaliasaun no reforsa dezenvolvimentu servisu, tuir lei no interesse públiku, hodi garantia administrasaun no gestaun terras no propriedades ne’ebé justu, efisiente no sustentável.

Governu liuhosi Ministru Justisa afirma, tenke garante funsionáriu sira hodi fó atendimentu ne’ebé apropriadu, efisiente no profesionál ba kliente sira. Funsionáriu sira mós tenke atentu seriu fó notifikasaun ba arrendatáriu sira ne’ebé la selu renda, hodi asegura katak, sira bele kumpre sira nia devér hanesan arrendatáriu.

Avaliasaun dezenpeñu servisu ida-ne’e, partisipa hosi Sua-Eselénsia Sekretáriu Estadu Terras Propriedades, Eng. Jaime Xavier Lopes, Diretór Jeral Polítika Justisa, Diretor Geral, Rejistu Notariadu, Diretoŕ Jeral Terras Propriedades, Diretór Nasionál no Diretór Munisipál sira, Xefe departamentu no funsionáriu sira hotu hosi Ministériu Justisa.

Fontes: https://www.facebook.com/share/p/1Xd5nnaM7y