Díli, 17 Dezembru 2025 – Sekretáriu Estadu Kooperativa (SEKoop), Eng. Arsénio Pereira da Silva, M.Agr., ohin fó pose ba Estrutura Konfederasaun Nasionál Multi-Kooperativa Timor-Leste (KNMKTL) ba períodu mandatu 2025–2029, ne’ebé sei sai hanesan mahon ba Federasaun Multi-Kooperativa sira iha Timor-Leste.

Iha diskursu iha serimónia fó pose ne’e, SEKoop hateten katak estabelesementu Konfederasaun marka istória foun ida ba movimentu kooperativa iha Timor-Leste, tanba depois independénsia, nasaun iha de’it federasaun kooperativa, maibé seidauk iha konfederasaun.

“Hau fó parabéns ba estrutura Konfederasaun ne’ebé foin simu pose. Ita hotu hatene katak kooperativa iha papél importante ba dezenvolvimentu ekonomia nasaun nian. Ho ezisténsia konfederasaun, sei sai mahon ba federasaun sira ne’ebé iha, hamutuk dezenvolve setór kooperativu hodi kontribui ba dezenvolvimentu ekonomia nasaun,” dehan SEKoop.

Nia mós hateten katak ho estabelesementu Konfederasaun, Timor-Leste hamriik hanesan nasaun seluk iha mundu, inklui fasilita ligasaun ho movimentu kooperativa rejionál no internasionál, hanesan ACCU, WOCCU no organizasaun seluk tan.

Prezidente Konfederasaun Nasionál Multi-Kooperativa Timor-Leste, Tito da Costa, hateten katak federasaun kooperativa 11 husi munisípiu sira, hanesan Lautém, Viqueque, Aileu, Liquiçá no munisípiu seluk tan, mak halibur hamutuk hodi estabelese KNMKTL.

“Konfederasaun ne’e harii ho inisiativa rasik hodi reprezenta federasaun kooperativa sira iha munisípiu hotu. Ami hamutuk hodi kontribui ba dezenvolvimentu nasionál,” dehan Tito da Costa.

Maski KNMKTL foin harii, nia hateten katak konfederasaun sei fó kontribuisaun ba dezenvolvimentu nasionál. Nia mós hato’o katak konfederasaun seidauk iha edifísiu rasik atu fasilita servisu, maibé sei halo esforsu hodi buka fatin adekuadu.

Iha situasaun ne’e, KNMKTL rekomenda ba SEKoop atu kontinua halo legalizasaun ba kooperativa primária sira, tanba legalidade importante tebes iha prosesu administrativu no dokumentasaun. Konfederasaun mós husu atu fasilita ligasaun ho Autoridade Munisípiu sira hodi fó apoiu ba federasaun kooperativa iha fatin.

Aleinde ne’e, KNMKTL husu ba SEKoop atu iha futuru tau planu iha Orsamentu Jerál Estadu (OJE) hodi fó insentivu ba kooperativa sira, nune’e bele fasilita federasaun sira halo sira-nia atividade.

Konfederasaun mós sujere atu fasilita formasaun ba membru sira, halo estudu komparativu ho nasaun seluk, fó apoiu mobiliáriu ba federasaun iha munisípiu sira, no apoia ligasaun entre SEKoop, banku no konfederasaun hodi bele fó kréditu ba kooperativa. Aleinde ne’e, husu mós kria sentru formasaun multifunsaun ba kooperativa iha Díli.

Planu estratéjiku KNMKTL durante mandatu 2025–2029 mak fó prioridade ba fortalese institusionál, konsolidasaun federasaun sira, hametin instituisaun kooperativa no diseminasaun Estatutu KNMKTL ba membru sira no parte interesada seluk.

Estrutura KNMKTL ne’ebé simu pose ohin kompostu husi Prezidente Konsellu Diretiva, Tito da Costa; Vise-Prezidente, Rique Ricardo Cardoso; Sekretária, Elsa da Costa Soares; Tesoureira, Maria Fátima Amorin; Vogal, Mario Almeida da Conceição. Estrutura Konsellu Fiskál mak Prezidente Norberto Hornay, Sekretáriu Francisco Alves dos Santos no Vogal Domingos Correia do Rego.

#Média SEKoop