Díli-Kinta loron 18/12/2025, S.E Ministra Finansas Sra. Santina José Rodrigues F. Viegas Cardoso, akompaña husi jestór sira realiza seremonia entrega Esbosu Padraun Kontabilidade Setor Publiku no Privadu faze II husi Governu Indonezia ba Governu Timor-Leste liuhusi Ministériu Finansas iha Diresaun Jerál Tezouru.

Liuhusi biban ne’e S.E Ministra Finansas Sra. Santina José Rodrigues F. Viegas Cardoso, hateten reforma husi esbosu padraun kontabilidade setór publiku no privadu ida ne’e la’ós sai de’it hanesan produtu ida, maibé bele iha kapasidade atu implementa no fó impaktu ba ekonomia Timor-Leste nian rasik.

Timor-Leste sai hanesan membru plena ba Asosiasaun Nasaun Sudeste Aziatiku (ASEAN-sigla inglés) nune’e obrigatoriamente tenke iha padraun kontabilidade ne’ebé hanesan ho nasaun membru sira.

Aleinde ne’e reprezentante embaixador Repúblika Indonesia iha Timor-Leste Sra. Banga Malewa iha abertura ba serimonia ne’e espera, governu Indonezia serbisu hamutuk nafatin ho Ministériu Finansas dezenvolve liután padraun kontabilidade ne’e atu sai konfiável ba setor públiku nomós privadu.

Partisipante husi governu Indonesia nian maka hanesan Reitór Politeknik Keuangan Negara (PKN-STAN) Sra. Evy Mulyani, Diretor Ezekutivu Indonesian AID Sr. Dalyono, inklui ekipa.

Atividade ne’e hala’o iha sala gabinete Ministra Finansas Aitarak-laran, hetan prezensa masimu husi jestor sira inklui tekniku.

Fontes: https://www.facebook.com/share/p/1BYnq4dTZs