Aileu, 19 Dezembru 2025 – Ministru Agrikultura, Pekuária, Peskas no Florestas (MAPPF), Eng. Marcos “MAMETA” da Cruz, MAgSt akompanha husi Sekretáriu Estadu Peskas (SEP) Domingos da Conceiçao ”Maukaro” no Embaixada Indonézia mai Timor Leste halo inaugura bá instalasaun aquikultura (sentru hakiak ikan Tilaphia) iha Munisípiu Aileu ne’ebé hetan apoiu fundus husi governu Indonézia.

“Ita agradese bá hotu-hotu liu-liu Governu Indonézia no mós bá Institutu Pertanian Bogor (IPB) no Indonézia Aid ho sira nia matenek, sira mai ajuda ona hodi estabelese sentru ne’e. ne’ebé ita sei servisu hamutuk nafatin atu oinsá maka bele iha sustentabilidade liu-liu aihan bá ikan nian”. Dehan Ministru bá jornalista sira iha sentru aqikultura Aileu, suku Lahae, Postu Aileu Vila, Munisípiu Aileu semana kotuk

.

Ministru Marcos dehan Sistema hanesan ne’e Governu Timor-Leste liu-husi Ministériu Agrikultura, Pekuária, Peskas no Florestas (MAPPF) mós instala ona iha Munisípiu Liquiça-Maubara no Bobonaro, maibé lori Governu TL nia naran apresia no agradese bá kooperasaun ida ne’e, tanba husi programa ida ne’e bele ajuda povu bele kore-an husi problema mal-nutrisaun no problema seguransa ai-han.

Tuir Ministru katak fatin ida ne’e sai eskollidu hodi harii sentru aquikultura ne’e tanba Aileu sai mós sentru bá area sira ne’ebé do’ok husi tasi. Ne’e duni bele prodúz ikan ho sustentavel ho kuantidade barak atu nune’e komunidade sira husi Hatubeliku no Maubise mós bele hetan asesu hodi mai sosa iha fatin ne’e.

“Ha’u hodi Primeiru Ministru nian naran hakarak agradese bá Governu Indonézia ne’ebé fó Green mai ita. Projetu ida ne’e, projetu ne’e boot ne’e duni sei ajuda ita nia problema iha seguransa alimentár”. Tenik Ministru

Iha fatin hanesan enkaregadu negósiu Embaixada Indonézia nian iha Timor-Leste, Nugroho Yuwono Aribhimo haktuir katak program ne’e raliaza tanba kolaborasaun husi Governu Indonezia no Timor-Leste atu dezenvolve aquikultura integradu iha TL. Programa subsidiu ne’e halo parte ida husi kompremisiu nasaun rua nian atu kombate mal-nutrisaun inklui hadi’a seguransa alimentár miha TL.

Programa ne’e foin mak implemeta bá dahuluk iha tinan ne’e no espera katak bele kontinua liu-tan bá oin iha tinan sira tuir mai hodi garante benéfisiu ne’ebé luan ho sustentavel liu-tan. Programa ne’ebé realiza daudaun ne’e maka hanesan konstrusaun bá fasilidade hakiak ikan, bee moos, treimanentu no monitorizasaun, fornesimentu ekipamentu fini no hahán ikan nian. Implementasaun programa ne’e hahú ho formasaun bá komunidade hakiak ikan Aileu nian iha IPB.

Portantu programa ne’e rasik realiza tanba hetan kolaborasaun di’ak husi Indonézia AID, IPB no mós Ministériu Agrikultura, Pekuária, Peskas no Florestas inklui Komunidade Aileu. Nu’udar reprejentante Embaixadór nia hato’o mós agradesimentu klean bá parte ne’ebé fó ona kontribuisaun hodi involve iha programa ne’e.

Seromonia inaugurasaun sentru aquikultura ne’e hetan partisipasaun husi Prezidente Autoridade Munisípiu Aileiu, Komandante Polisia Munisípiu Aileiu, Reprejentante husi Embaixada Indonézia, Embaixada Filipina, Diretór Servisu Agrikultura Aileu, Autoridade Lokál, Estudante etajiariu husi UCT, Lian nain, Komunidade Aquikultór sira.