Manatutu, 18 Dezembru 2025 – Ministru Agrikultura, Pekuária, Peskas no Floresta (MAPPF), Eng. Marcos ”MAMETA” da Cruz, MAgSt halo observasaun bá mota Somasi iha Munisípiu Manatutu hodi haree kondisaun no progresu konstrusaun moru protesaun ne’ebé la’o iha mota refere inklui kondisaun Sipon (saluran bawah tanah) ne’ebé nakonu ho sedimentasaun.

“Loron hirak liu-bá sira konsege hamo’os tiha Sipon ne’ebé konstroi iha mota Somasi ne’e. maibé horikalan mota tun makas, entaun estraga tiha, bee nakonu tiha iha Sipon ne’e”. dehan Ministru Marcos bá jornalista sira iha area mota Somasi ne’ebé lokaliza iha Munisípiu Manatutu.

Tanba ne’e, Ministru husu ona bá kompanha atu halo fali maibé tenke normaliza uluk bee ne’e atu asegura mota labele tama tan iha sipon ne’e. tanba importante tebes bá fulan oin hahú janeiru 2026 ne’e agrikultór sira halai ona sira nia natar.

Problema husi Sipon ne’e maka daudaun ne’e sedimentasaun hanesan tahu ten mak nakonu tiha iha nia laran. Entaun presiza hamós tiha atu bele garante katak fornesimentu bee bá agrikultór sira bele la’o nafatin, hodi nune’e agrikultór sira bele halai sira nia natar.

Portantu kompanhia mós promete sei halo fali sira nia servisu hodi hamo’os tiha sedimentasaun iha sipon no kanal ne’e, atu bele garante bee bá natar sira bele la’o di’ak fali.

Husi observasaun ne’ebé Ministru halo bá mota Somasi ne’e hetan akompahamentu husi Prezidente Autoridade Munisípiu Manatutu (PAM) Komandante Polisia Munisípiu Mantutu, Diretór Nasionál Hortikultura, Diretór Servisu Agrikultura Munisípiu Manatutu.