Manatutu, 18 Dezembru 2025 – Ministru Agrikultura, Pekuária, Peskas no Floresta (MAPPF), Eng. Marcos”MAMETA” da Cruz intrega ekipamentu agríkola modernu hamutuk unidade 17 bá Prezidente Autoridade Munisípiu (PAM) Manatutu atu distribui bá komunidade agrikultór sira hodi hasa’e produsaun haree iha Manatutu.

“Ohin ita mai iha ne’e atu distribui no intrega mákina sira ne’e bá PAM Manatutu, atu bele fó bá agrikultór sira , hodi bele halo natar. Mákina mak ne’e, iha tractor boot 2, tractor kuda hare 10 no mákina kua hare 5 inklui bandeza kuda fini hare 3.000 ”. dehan Ministru Marcos bá jornalista sira iha Munisípiu Manatutu kuinta ne’e.

Ministru Marcos ‘’MAMETA’’ informa katak, IX Governu Konstitusional liu-husi Ministériu Agrikultura, Pekuária, Peska no Floresta halo distribuisaun mákina modernu bá agrikultór sira ne’e tanba hakarak aumenta produsaun agrikultura. Ministru dehan agora tama ona tempu udan, ne’e duni hahú janeiru 2026 bá oin agrikultór sira iha Manatutu hahú halo natar ona. Tan ne’e Ministériu realiza programa distribuisaun ne’e atu fasilita agrikultór sira bele utuliza sasán sira ne’e iha tempu ne’ebé presiza.

“Ita halo distribuisaun bá PAM atu sira bele intrega tutan bá agrikultór sira. Maibé ita husu bá autoridade sira iha Manatutu bele halo identifikasaun ho lolos bá agrikultór sira, atu bainhira halo distribuisaun karik bele fó duni bá agrikultór ne’ebé iha natar no iha komitmentu hakarak halai natar”. Tenik Ministru

Tanba ekipamentu agríkola modernu ne’ebé Ministériu distribui ne’e, bele motiva no fasilita agrikultór sira hodi hakma’an sira nia kolen no todan, inklui redúz kustu ne’ebé agrikultór sira uza iha atividade fila rai no tempu kolleta.

Iha serimónia intrega ekipamentu ne’e, hetan partisipasaun husi Prezidente Autoridade Munisípiu Manatutu, Diretór Nasional Hortikultura, Diretór Servisu Agrikultura Munisípiu Manatutu, xefe departamentu, extensionista, funsionariu no komunidade agrikultór sira.