Ermera loron 22, fulan,Dezembru, tinan 2025, Sekretariu Estadu ba Formasaun Profisionál no Empregu, Sua Exelensia Rogério Araújo Mendonça L.Ed, hala'o Inagurasaun ba Sentru Formasaun lian Inglês iha Munisipiu Ermera.

Iha diskursu Sekretariu Estadu hato'o agradesementu ba Governu Austrália ne'ebé mak sempre Apoia SEFOPE hodi konstrui ona Sentru Formasaun lian Inglés ba iha Munisipiu sira.

"Agradese ba Governu Austrália, tanba fundus ne'ebé mak apoia ona liu husi Fundus DBS, reforsa ona SEFOPE liu,liu hodi konstrusaun ba sentru formasaun lima hahu husi tinan 2024 mai to'o tinan 2025."dehan Sekretariu Estadu.

Sekretariu Estadu Fundamenta katak, apoia ne'ebé mak Governu Austrália fó hahu husi tinan 2024 SEFOPE konsege konstrui ona sentru Formasaun lian Inglês ba Munisipiu lima.

"Ita halo ona konstrusaun ba sentru formasaun lima ne'e, nia objetivu hodi bele haforsa hodi hasae kuota traballador sira ne'ebé mak atu ba servisu iha Austrália." Tenik sekretariu Estadu

Sekretariu akresenta katak, SEFOPE nafatin servisu ho Governu Austrália, hodi bele expanda tan sentru formasaun ba Munisipiu sira seluk mós, atu nune'e bele hasae numeru traballador ho numeru boot liu iha futuru.

"Espera parte SEFOPE kontinua servisu hamutuk nafatin ho Governu Austrália, liu-liu foku atu hasae kouta traballador Timor oan ho numeru ne'ebé boot hahu husi tinan 2025 ba to'o tinan 2028, ho nune'e ita nafatin husu sira nia tulun hodi loke nafatin sentru formasaun sira ne'ebé mak bele ajuda responde ba merkadu traballu iha Austrália" hateten Sekretariu Estadu.

Iha serimónia inagurasaun Sentru formasaun ne'e partisipa mos husi Governu Austrália liu husi Primeira Sekretaria Embaixadora Austrália iha Timor-Leste, Reprezentante Presidente Autoridade Munisipiu Ermera no Entidade sira selu.