Lautem -09/01 2026. Ministru Agrikultura, Pekuária, Peskas no Florestas Marcos "MAMETA" da Cruz, akompaña Primeiru Ministru intrega ekipamentu agrikola modernu unidade 5 bá Prezidente Autoridade Munisípiu (PAM) Lautem hodí distribui bá komunidade agrikultór sira iha suku Ililai no suku Euquisi atu utiliza hodi hasa'e produsaun agrikola.

Ekipamentu Agrikola modernu unidade 5 ne'ebé IX Governu Konstitusionál liu-hosi Ministériu Agrikultura, Pekuária, Peskas no Florestas prepara hodi intrega ona bá PAM Lautem ne'e mak hanesan tratór kubota médiu L 5018 unidade 2 (inklui rotary unidade 2 no taxu sarua unidade 1), Mákina kuda hare unidade 1, mákina koa hare unidade 2, no mós rak ka bandeza viveirus fatin hamutuk 600 pes.

Molok intrega ekipamentu bá PAM Lautem, parte uma kreda liu-husi Vigáriu Episkopál Asuntu Sosiál no Edukasaun Dioseze Baucau fó bensaun uluk bá ekipamentu sira.

Serimónia ne'e hetan partisipasaun husi Membru Governu sira, Deputada, Assesór Prinsipál Prezidente da Repúblika, Xefe Estadía Mayor FALINTIL- Forsa Defeza Timor-Leste (F-FDTL), Komandante Polisia Munisípiu Lautem, korpu diplomátiku sira, Parseiru Dezenvolvimentu sira, Veteranu, sosiedade Sivíl, Administrador Postu Administrativu, Diretór jerais no Nasionál husi instituisaun Estadu nian, Xefe suku no Aldeia sira, Uma kreda, Estudante inklui Agrikultór sira.